હનોઈ: વિયેતનામના લોકપ્રિય પ્રવાસન સ્થળ ફુ ક્વોક ટાપુ નજીક શનિવારે સર્જાયેલા ગંભીર બોટ અકસ્માતમાં ૧૫ ભારતીય પ્રવાસીઓના કમકમાટીભર્યા મોત થયા છે. લાવા મોબાઇલ્સ દ્વારા પોતાના ડીલરો અને વિતરકો માટે આયોજિત ટ્રીપ દરમિયાન ૩૬ લોકો સવાર હતી તેવી સ્પીડબોટ સમુદ્રમાં પલટી જતાં તમિલનાડુના ૧૦, આંધ્રપ્રદેશના ૩ અને કેરળના ૨ લોકોએ જીવ ગુમાવ્યા હતા. બચાવ ટીમોએ તાત્કાલિક કાર્યવાહી કરી ૨૧ લોકોને સુરક્ષિત બહાર કાઢ્યા છે.

બચી ગયેલા પ્રવાસીઓએ દુર્ઘટનાના ભયાનક દ્રશ્યો વર્ણવતા જણાવ્યું હતું કે, દરિયામાં ઉઠેલા મોજા અને સંભવિત ઓવરલોડિંગને કારણે બોટ માત્ર થોડી સેકન્ડોમાં જ એક તરફ નમીને પલટી ગઈ હતી. પ્રવાસીઓ ફોટા પાડી રહ્યા હતા ત્યાં જ આ હોનારત સર્જાઈ હતી. મુરુગરાજ અને આશિષ કુમાર જેવા બચી ગયેલા લોકોએ જણાવ્યું કે, હોડી ટાપુથી માત્ર ૩૦૦-૪૦૦ મીટર દૂર હતી ત્યારે મદદ માટે ચીસો પાડતા લોકોના દ્રશ્યો હજુ પણ તેમની આંખો સામે છે.

ભારતીય દૂતાવાસ અને લાવા મોબાઇલ્સની ટીમો અત્યારે વિયેતનામમાં તૈનાત છે અને મૃતદેહોને વહેલી તકે સ્વદેશ પરત લાવવાની પ્રક્રિયા કરી રહી છે. મૃતકોના પરિવારજનોને શક્ય તમામ સહાય પૂરી પાડવા માટે રાજ્ય સરકારો અને કેન્દ્ર સરકાર વચ્ચે સંકલન સાધવામાં આવી રહ્યું છે. લાવા મોબાઇલે શોક વ્યક્ત કરતા જણાવ્યું હતું કે તેઓ આ દુઃખદ ઘડીમાં પ્રભાવિત પરિવારો સાથે સતત સંપર્કમાં છે અને દરેક પ્રકારે સહયોગ આપી રહ્યા છે.

આ દુર્ઘટના બાદ વિયેતનામમાં પ્રવાસન સુરક્ષા પર ગંભીર સવાલો ઉભા થયા છે. આગામી દિવસોમાં આ અકસ્માત પાછળના ચોક્કસ કારણો, જેમ કે બોટની ક્ષમતા કરતા વધુ મુસાફરો કે હવામાનની સ્થિતિની અવગણના, તેની તપાસ કરવામાં આવશે. અત્યારે પ્રાથમિકતા મૃતદેહોને ભારત લાવવાની અને સ્વજનોને સોંપવાની છે, ત્યારબાદ સરકારી સ્તરે તપાસ અને વળતર અંગેની આગળની કાર્યવાહી હાથ ધરવામાં આવશે.