લંડન: જો તમે પણ આ ઉનાળાની વેકેશન સીઝનમાં તમારા પરિવાર અને નાના બાળકો સાથે યુનાઇટેડ કિંગડમ (UK) જવાનું પ્લાનિંગ કરી રહ્યા હોવ, તો તમારા માટે બ્રિટિશ સરકાર તરફથી એક શાનદાર અને રાહત આપનારા સમાચાર આવ્યા છે. યુકે સરકારે આંતરરાષ્ટ્રીય એરપોર્ટ પર મુસાફરોનો ઘસારો અને કતારો ઓછી કરવા માટે એક મોટો નિર્ણય લીધો છે. આગામી જુલાઈ મહિનાથી એરપોર્ટ પર લાગેલા ઓટોમેટેડ ઇલેક્ટ્રોનિક પાસપોર્ટ ગેટ (e-Gates) ની સુવિધા હવે નાના બાળકો માટે પણ વિસ્તૃત કરવામાં આવશે. આ સુધારાને કારણે એરપોર્ટ પર બોર્ડર ઈમિગ્રેશનની પ્રક્રિયા અત્યંત ઝડપી બની જશે.

જાણો કોણ હોઈ શકે છે આ સુવિધા માટે પાત્ર?

યુકે હોમ ઓફિસ (Home Office) દ્વારા કરવામાં આવેલી સત્તાવાર જાહેરાત અનુસાર, ૮ જુલાઈ ૨૦૨૬ થી આ નવો નિયમ અમલમાં આવી જશે. જોકે, આ અંતર્ગત સરકારે કેટલીક મહત્વની શરતો પણ જાહેર કરી છે:

• બાળકની ઉંમર ૮ અથવા ૯ વર્ષ હોવી જોઈએ.
• બાળકની ઊંચાઈ ઓછામાં ઓછી ૧૨૦ સેન્ટીમીટર હોવી ફરજિયાત છે (જેથી કેમેરા ચહેરો સ્કેન કરી શકે).
• બાળકની સાથે એક પુખ્ત વયના મુસાફર (Adult) હોવા જરૂરી છે.

આ નવો નિયમ યુકેના તમામ મોટા એરપોર્ટ તેમજ યુરોપમાં આવેલા બ્રિટિશ સરહદ નિયંત્રણના પસંદગીના પોઈન્ટ્સ પર કાર્યરત ૨૯૦ થી વધુ ઈ-ગેટ્સને આવરી લેશે.

વેકેશન સીઝનમાં ૧૫ લાખથી વધુ બાળકોને મળશે સીધો લાભ

સરકારના સત્તાવાર આંકડાઓ અને ૨૦૨૫ ના આગમન ડેટાના વિશ્લેષણ મુજબ, આ પાત્રતાના વિસ્તારને કારણે આગામી એક વર્ષમાં અંદાજે ૧૫ લાખ (૧.૫ મિલિયન) જેટલા વધારાના બાળકો આ ડિજિટલ ગેટનો ઉપયોગ કરી શકશે. બ્રિટિશ સત્તાવાળાઓના મતે, આ પગલાથી બોર્ડર સિક્યોરિટીની કડક સુરક્ષા જાળવી રાખીને, પીક વેકેશન સમયગાળા દરમિયાન મુસાફરી કરતા પરિવારોનો કિંમતી સમય બચાવી શકાશે.

યુકેના સ્થળાંતર અને નાગરિકતા મંત્રી માઈક ટેપે આ અંગે ખુશી વ્યક્ત કરતા જણાવ્યું હતું કે, "નાના બાળકો સાથે એરપોર્ટ પર લાંબી લાઈનોમાં ઊભા રહેવું માતાપિતા માટે ખૂબ જ તણાવપૂર્ણ હોય છે. ઈ-ગેટ એક્સેસનો વ્યાપ વધારીને અમે પરિવારો માટે વતન વાપસી કે પ્રવાસને વધુ ઝડપી અને સરળ બનાવી રહ્યા છીએ."

'કોન્ટેક્ટલેસ બોર્ડર' તરફ આગળ વધતું યુનાઇટેડ કિંગડમ

બોર્ડર ફોર્સના ડાયરેક્ટર જનરલ ફિલ ડગ્લાસ અને 'AirportsUK' ના ચીફ એક્ઝિક્યુટિવ કરેન ડીએ પણ આ નિર્ણયને આવકાર્યો છે. તેમણે જણાવ્યું કે આ ટેકનોલોજીના કારણે ઈમિગ્રેશન ચેકપોઈન્ટ પર સામાન્ય મુસાફરો માટે પણ કતારો નાની થઈ જશે.

આ સુધારો યુકેના વ્યાપક બોર્ડર આધુનિકીકરણ પ્રોજેક્ટનો એક હિસ્સો છે, જે અંતર્ગત અત્યાર સુધીમાં આશરે ૨.૫ કરોડ 'ઇલેક્ટ્રોનિક ટ્રાવેલ ઓથોરાઇઝેશન' (ETA) જારી કરવામાં આવ્યા છે. ફેસ રેકગ્નિશન (ચહેરાની ઓળખ) ટેકનોલોજીનો ઉપયોગ કરીને યુકે તેના એરપોર્ટસને સંપૂર્ણપણે "કોન્ટેક્ટલેસ બોર્ડર" માં ફેરવી રહ્યું છે, જ્યાં ઇ-ગેટ્સ પાર કરવામાં મુસાફરોને માત્ર થોડી જ મિનિટોનો સમય લાગશે.