શ્રીનગર : દેશની અખંડિતતા અને સાર્વભૌમત્વને પડકારનારા તત્વો વિરુદ્ધ અદાલતે ફરી એકવાર કડક વલણ અપનાવ્યું છે. જમ્મુ-કાશ્મીર અને લદ્દાખ હાઇકોર્ટે એક સીમાચિહ્નરૂપ ચુકાદો આપતાં સ્પષ્ટ ઠરાવ્યું છે કે, જમ્મુ અને કાશ્મીરના સ્થાનિક રહેવાસીઓને બાકીના ભારત દેશથી અલગ કરવા કે દૂર રાખવાના દુષ્ટ આશયથી પ્રચારાત્મક પોસ્ટરો લગાવવા, તે કડક કાયદા સમાન ‘ગેરકાયદેસર પ્રવૃત્તિઓ (નિવારણ) અધિનિયમ’ (UAPA) ની કલમ ૧૩ હેઠળ ગુનો દાખલ કરવા અને ચાર્જશીટ (આરોપો) ઘડવા માટેના તબક્કે બિલકુલ પૂરતા છે.

જસ્ટિસ રજનીશ ઓસવાલ અને જસ્ટિસ સંજય પરિહારની ડિવિઝન બેન્ચે શ્રીનગરની વિશેષ એનઆઈએ (NIA) કોર્ટના આદેશ સામે આરોપી અદનાન બશીર બાંગરુ અને મોહમ્મદ મનન ડાર દ્વારા દાખલ કરવામાં આવેલી અપીલોને સંપૂર્ણપણે ફગાવી દીધી છે. હાઇકોર્ટે અવલોકન કર્યું હતું કે, ફરિયાદી પક્ષ (પોલીસ) તરફથી રજૂ કરાયેલા દસ્તાવેજો સ્પષ્ટ કરે છે કે પાકિસ્તાન સ્થિત આકાઓ અને પ્રતિબંધિત આતંકવાદી સંગઠન 'ધ રેઝિસ્ટન્સ ફ્રન્ટ' (TRF) ના સભ્યો સાથે મળીને ભારત વિરુદ્ધ વ્યાપક કાવતરું ઘડવામાં આવ્યું હતું, જેના માટે રેકોર્ડ પર પૂરતી સામગ્રી ઉપલબ્ધ છે.

પોસ્ટરો પાછળ રાષ્ટ્ર સામે અસંતોષ ફેલાવવાનો 'ઇરાદાપૂર્વકનો પ્રયાસ'

માનનીય હાઈકોર્ટે ચુકાદો આપતી વખતે કડક શબ્દોમાં નોંધ્યું હતું કે, "અમારા અંદાજ મુજબ, જપ્ત કરાયેલા પોસ્ટરોની સામગ્રી જ અપીલકર્તાઓ પર કાયદાની કલમ ૧૩ હેઠળ દેશવિરોધી ગુનો સાબિત કરવા માટે પૂરતી છે. આ પોસ્ટરોના લખાણમાં કાશ્મીરી નાગરિકોના મનમાં બાકીના ભારત પ્રત્યે ઝેર ઘોળવાનો અને દેશથી અલગ કરવાનો ઇરાદાપૂર્વકનો પ્રયાસ કરવામાં આવ્યો છે, જે રાષ્ટ્ર સામે અસંતોષ અને આક્રોશ ફેલાવવા માટે પૂરતો પુરાવો છે."

અદાલતે બચાવ પક્ષની દલીલોને ફગાવતા ઉમેર્યું કે, જ્યારે લોઅર કોર્ટ આરોપીઓ સામે ચાર્જ (આરોપ) ફ્રેમ કરતી હોય, ત્યારે માત્ર એટલું જ જોવાનું હોય છે કે પ્રથમ દ્રષ્ટિએ (Prima Facie) કેસ બને છે કે નહીં. તે તબક્કે કોર્ટ પુરાવાઓની બારીક તપાસ કરીને કોઈ 'મિની-ટ્રાયલ' (નાની અદાલતી કાર્યવાહી) શરૂ ન કરી શકે. જો આરોપી વિરુદ્ધ ગુનો કરવાના સંકેત આપતી કાનૂની સામગ્રી હાજર હોય, તો કાયદેસર રીતે આરોપો ઘડી શકાય છે.

૨૦૨૪ ની સંસદીય ચૂંટણીઓ પહેલા લોહીયાળ ખેલ ખેલવાની હતી ધમકી

આ સમગ્ર હૃદયકંપાવનારો મામલો માર્ચ ૨૦૨૪ માં પ્રકાશમાં આવ્યો હતો. આતંકી સંગઠન TRF દ્વારા ૨૦૨૪ ની લોકસભા ચૂંટણીઓ પહેલા મતદાન કરવા આવતા નિર્દોષ નાગરિકો અને ચૂંટણી અધિકારીઓને નિશાન બનાવતો એક ધમકીભર્યો સંદેશ ટેલિગ્રામ ચેનલ ‘કાશ્મીર ફાઇટ્સ’ (Kashmir Fights) પર અપલોડ કરાયો હતો. જે સંદર્ભે શ્રીનગરના શહીદ ગુંજ પોલીસ સ્ટેશનમાં પ્રથમ માહિતી અહેવાલ (FIR) દાખલ કરાયો હતો.

ત્યારબાદ, ૧૯ માર્ચ ૨૦૨૪ ના રોજ જહાંગીર ચોક ખાતે કડક વ્હીકલ ચેકિંગ દરમિયાન પોલીસે બાઇક સવાર બાંગરુ અને ડારને આંતર્યા હતા. તપાસ દરમિયાન ડારના શર્ટ નીચે છુપાવેલા ૧૪ દેશવિરોધી દેશદ્રોહી પોસ્ટરો અને રૂ. ૧ લાખની શંકાસ્પદ રોકડ જપ્ત કરાઈ હતી, જ્યારે બાંગરુ પાસેથી બીજા ૨૫ પોસ્ટરો અને ગુંદરની બોટલ મળી આવી હતી.

ડિજિટલ પુરાવાઓએ આતંકીઓનો ભાંડો ફોડ્યો:

· મોબાઈલ લોકેશન: ગુનાના દિવસે બંને આરોપીઓ શ્રીનગરના કમરવાડી વિસ્તારમાં સાથે હોવાનો લોકેશન ડેટા મળ્યો છે.

· પાક. કનેક્શન: બંનેના ફોનમાંથી પાકિસ્તાની હેન્ડલર્સ અને માર્યા ગયેલા ખુંખાર TRF આતંકવાદી મોમિન ગુલઝારના ફોટોગ્રાફ્સ અને વોટ્સએપ ચેટ મળી આવ્યા છે.

· બેનામી રોકડ: ડાર પોતાના ખિસ્સામાંથી મળેલા ₹૧ લાખ ક્યાંથી આવ્યા તેનો કોઈ બેંક પુરાવો કે હિસાબ આપી શક્યો નથી, જે રકમ આતંકી પ્રવૃત્તિ માટે સપ્લાય થવાની હતી.

હાઈકોર્ટે સ્પષ્ટ કર્યું કે આ કેસ માત્ર પોસ્ટરો કે રોકડ રાખવા પૂરતો મર્યાદિત નથી, પરંતુ સરહદ પાર બેઠેલા આકાઓ સાથે મળીને ભારતની સાર્વભૌમત્વને સીધો પડકાર ફેંકવાનું મોટું ષડયંત્ર હતું. આ સાથે જ અદાલતે બંને આરોપીઓ સામે UAPA ની કલમ ૧૩, ૧૮, ૩૯, ૪૦(૨) અને આઈપીસીની કલમ ૫૦૬ હેઠળના આરોપોને યથાવત રાખી ટ્રાયલ કોર્ટને સ્વતંત્ર રીતે સુનાવણી આગળ ધપાવવા આદેશ આપ્યો છે.