આવતા વર્ષે ટ્રમ્પ ભારત આવશેઃ બંને દેશ વચ્ચે દોસ્તીનો નવો અધ્યાય
ટ્રેડ ડીલનો નવો ઇતિહાસ લખાશેઃ વિદેશ મંત્રી માર્કો રુબિયોએ કરી સત્તાવાર જાહેરાત
નવી દિલ્હી, તા.૨૭: ભારત અને અમેરિકા વચ્ચેના વૈશ્વિક સંબંધો આગામી દિવસોમાં નવી ઊંચાઈઓ સર કરવા જઈ રહ્યા છે. વિદેશ મંત્રી માર્કો રુબિયોએ વ્હાઇટ હાઉસથી એક મોટી જાહેરાત કરતા જણાવ્યું છે કે, અમેરિકી રાષ્ટ્રપતિ ડોનાલ્ડ ટ્રમ્પ વર્ષ ૨૦૨૭ની શરૂઆતમાં ભારતની ભવ્ય મુલાકાતે આવશે. પીએમ મોદી અને રાષ્ટ્રપતિ ટ્રમ્પ વચ્ચેની કેમિસ્ટ્રી જગજાહેર છે, અને તાજેતરમાં જ ફ્રાન્સમાં યોજાયેલી G7 સમિટ દરમિયાન બંને નેતાઓ વચ્ચે થયેલી મુલાકાત બાદ આ પ્રવાસનો પાયો નંખાયો છે. માર્કો રુબિયો પોતે ચાલુ વર્ષના અંત સુધીમાં ભારત આવીને આ ઐતિહાસિક વીવીઆઈપી પ્રવાસની આખરી રૂપરેખા અને સુરક્ષા વ્યવસ્થાઓને અંતિમ ઓપ આપશે.
આ હાઈ-પ્રોફાઈલ પ્રવાસ માત્ર ઔપચારિક મુલાકાત નથી, પરંતુ બંને દેશો વચ્ચે વર્ષોથી પેન્ડિંગ પડેલા મોટા વેપાર કરારને આખરી ઓપ આપવાનું મુખ્ય હથિયાર બનશે. ભારતમાં અમેરિકાના એમ્બેસેડર સર્જિયો ગોરે સંકેત આપ્યા છે કે બંને મહાસત્તાઓ વ્યાપારી કરારની ખૂબ જ નજીક છે અને હવે માત્ર ગણતરીના ટેકનિકલ મુદ્દાઓ ઉકેલવાના બાકી છે. આ ડીલના ભાગરૂપે ભારત અમેરિકા અને વેનેઝુએલા સાથે તેલ પુરવઠો વધારવા પર પણ સક્રિય ચર્ચા કરી રહ્યું છે. અમેરિકાએ ભારતીય રિફાઇનરીઓની ભારે ક્રૂડ ઓઇલ પ્રોસેસ કરવાની અદભુત ક્ષમતાના ખુલ્લા મને વખાણ કર્યા છે, જે આ વૈશ્વિક ભાગીદારીને વ્યાપારી દ્રષ્ટિએ મજબૂત બનાવશે.
જો કે, આ દોસ્તીના માર્ગમાં તાજેતરમાં કેટલાક વળાંકો પણ આવ્યા હતા. ગયા વર્ષે ટ્રમ્પ પ્રશાસન દ્વારા ભારત પર લાદવામાં આવેલા ટેરિફ અને ઓમાનના અખાતમાં હોર્મુઝ સ્ટ્રેટ ખાતે અમેરિકી સૈન્ય કાર્યવાહી દરમિયાન ત્રણ ભારતીય ખલાસીઓના મોતના કારણે સંબંધોમાં થોડી ખટાશ આવી હતી. પરંતુ પીએમ મોદીએ G7 સમિટમાં સીધા જ ડોનાલ્ડ ટ્રમ્પ સમક્ષ ભારતીય ખલાસીઓની સુરક્ષાનો ગંભીર મુદ્દો ઉઠાવીને રાજદ્વારી કુનેહ બતાવી હતી. ટ્રમ્પે છેલ્લે ફેબ્રુઆરી ૨૦૨૦માં અમદાવાદના વિશ્વ પ્રસિદ્ધ ‘નમસ્તે ટ્રમ્પ‘ કાર્યક્રમમાં હાજરી આપી હતી, ત્યારે હવે ૨૦૨૭માં યોજાનારી આ મુલાકાત આર્થિક, વ્યૂહાત્મક અને વેપાર ક્ષેત્રે ‘ગેમ ચેન્જર' સાબિત થશે તેમાં કોઈ શંકા નથી.
(2:43 PM IST)
છેલ્લા 8 દિવસમાં સૌથી લોકપ્રિય 
