તા. ૧૬ નવેમ્બર ર૦ર૬ વિક્રમ સંવત ર૦૮૩ કારતક સુદ – ૭ સોમવાર
News of Monday, 16th November 2026
ટ્રમ્પ, શી જિનપિંગ અને પુતિન ૧૯ નવેમ્બરે ચીનમાં મળશે
ત્રણેય દેશોની પહેલી ત્રિપક્ષીય બેઠક હશે : પરમાણુ શસ્ત્રોની મર્યાદા, ઈરાન યુદ્ધ અને આંતરરાષ્ટ્રીય સુરક્ષા સંબંધિત મુદ્દાઓ પર ચર્ચા થવાની શક્યતા

શેનઝેન,તા.૧૬: વિશ્વની ત્રણ મુખ્ય પરમાણુ શક્તિઓ, યુનાઇટેડ સ્ટેટ્સ, રશિયા અને ચીનના રાષ્ટ્રપ્રમુખો પહેલીવાર એકસાથે મળશે. યુએસ પ્રમુખ ડોનાલ્ડ ટ્રમ્પ, ચીનના રાષ્ટ્રપતિ શી જિનપિગ અને રશિયન રાષ્ટ્રપતિ વ્લાદિમીર પુતિન ૧૯ નવેમ્બર, ગુરુવારના રોજ ચીનના શેનઝેનમાં મળશે. ચીને સોમવારે સત્તાવાર રીતે આ વાતની પુષ્ટિ કરી. આ બેઠક એશિયા-પેસિફિક આર્થિક સહયોગ (APEC) સમિટના બીજા દિવસે યોજાશે.
APEC સમિટ ૧૮ અને ૧૯ નવેમ્બરના રોજ દક્ષિણ ચીનના શેનઝેનમાં યોજાઈ રહી છે. આ બેઠકમાં ત્રણેય નેતાઓ મુખ્ય વૈશ્વિક મુદ્દાઓ પર ચર્ચા કરશે. જોકે, બેઠકનો સંપૂર્ણ એજન્ડા હજુ સુધી જાહેર કરવામાં આવ્યો નથી. ચીનના વિદેશ મંત્રાલયે સોમવારે એક નિવેદન બહાર પાડીને જણાવ્યું હતું કે શી જિનપિગ, ડોનાલ્ડ ટ્રમ્પ અને વ્લાદિમીર પુતિન વચ્ચે ત્રિપક્ષીય બેઠક ૧૯ નવેમ્બરે યોજાશે. અમેરિકા અને રશિયાએ પણ આ બેઠકની પુષ્ટિ કરી છે.
વ્હાઇટ હાઉસના જણાવ્યા અનુસાર, ટ્રમ્પ આ બેઠકમાં વિશ્વમાં પરમાણુ શષોની સંખ્યા ઘટાડવાનો મુદ્દો ઉઠાવશે. અમેરિકા ઇચ્છે છે કે ચીન પરમાણુ શષોને મર્યાદિત કરવાના કરારમાં જોડાય. હાલમાં, અમેરિકા અને રશિયા પાસે ચીન કરતા ઘણા વધુ પરમાણુ શસ્ત્રો છે. યુએસ ડિપાર્ટમેન્ટ ઓફ ડિફેન્સ અનુસાર, ચીન પાસે ૬૦૦ થી વધુ પરમાણુ શસ્ત્રો છે, જ્યારે અમેરિકા અને રશિયા દરેક પાસે ૫,૦૦૦ થી વધુ છે.
અમેરિકા અને રશિયા વચ્ચે પરમાણુ શસ્ત્રોને મર્યાદિત કરવાની છેલ્લી સંધિ ફેબ્રુઆરી ૨૦૨૬ માં સમાપ્ત થઈ ગઈ હતી. આનાથી બંને દેશો વચ્ચે પરમાણુ શષો પરની અગાઉની મર્યાદાઓ પણ સમાપ્ત થઈ ગઈ. ટ્રમ્પ હવે એક નવો કરાર કરવા માંગે છે જેમાં ચીનનો સમાવેશ થાય છે. જો કે, ચીન કહે છે કે તેની પાસે અમેરિકા અને રશિયા જેટલા પરમાણુ શસ્ત્રો નથી, તેથી તે હાલમાં આવી વાટાઘાટોમાં ભાગ લેવા તૈયાર નથી.
ટ્રમ્પ આ બેઠકમાં ઈરાન યુદ્ધનો મુદ્દો પણ ઉઠાવી શકે છે. તેમણે અગાઉ કહ્યું હતું કે તેઓ ઈરાન યુદ્ધને સમાપ્ત કરવાના માર્ગો પર ચર્ચા કરવા માટે શી જિનપિગ અને પુતિન સાથે મળવા માંગે છે. જોકે, આ બેઠકના એજન્ડામાં યુક્રેન યુદ્ધ હોવાની શક્યતા ઓછી છે. યુએસ અધિકારીઓના મતે, આ મુદ્દો અલગથી ચર્ચા કરવામાં આવશે. ચીનનું કહેવું છે કે યુક્રેન યુદ્ધ પરની ચર્ચામાં યુરોપિયન દેશોને પણ સામેલ કરવા જોઈએ.
આ બેઠક ત્રણેય દેશો વચ્ચેના સંબંધોની દ્રષ્ટિએ મહત્વપૂર્ણ માનવામાં આવે છે. રશિયા અને ચીન વચ્ચે ગાઢ સંબંધો છે, જ્યારે બંને દેશોના અમેરિકા સાથે વેપાર, સુરક્ષા અને રાજકીય મુદ્દાઓ પર મતભેદ છે.(
(10:09 AM IST)









છેલ્લા 8 દિવસમાં સૌથી લોકપ્રિય 
