અમદાવાદ : અયોધ્યા રામમંદિર નિર્માણ માટે એકત્ર થયેલા દાનમાં કથિત કૌભાંડ મુદ્દે હવે અંતરરાષ્ટ્રીય હિન્દુ પરિષદના પ્રમુખ ડૉ. પ્રવિણ તોગડિયા મેદાનમાં આવ્યા છે. અમદાવાદ ખાતે યોજાયેલી એક પ્રેસ કોન્ફરન્સમાં તેમણે આ મામલે આકરા શબ્દોમાં નારાજગી વ્યક્ત કરી અને સરકાર પાસે તાત્કાલિક કાર્યવાહીની માંગ કરી છે.

ડૉ. તોગડિયાએ જણાવ્યું કે, "રામમંદિર માટે દેશના ખૂણે ખૂણેથી ગરીબમાં ગરીબ હિન્દુએ પોતાની શ્રદ્ધાથી 10 રૂપિયા, 100 રૂપિયાનું દાન આપ્યું છે. આ દાનમાં જો કૌભાંડ થયું હોય તો એ માત્ર પૈસાની ચોરી નથી, પરંતુ કરોડો રામભક્તોની શ્રદ્ધાની હત્યા છે. આ અક્ષમ્ય અપરાધ છે."

તેમણે સરકાર સમક્ષ 3 મુખ્ય માંગણીઓ મૂકી: 

1. સમગ્ર મામલાની તાત્કાલિક CBI તપાસ કરાવવામાં આવે. 

2. આ કેસ ફાસ્ટ ટ્રેક કોર્ટમાં ચલાવવામાં આવે. 

3. જે પણ ગુનેગારો સાબિત થાય તેમને મૃત્યુદંડની સજા કરવામાં આવે. 

ડૉ. તોગડિયાએ ચીમકી ઉચ્ચારી કે જો સરકાર 15 દિવસમાં નક્કર કાર્યવાહી નહીં કરે તો અંતરરાષ્ટ્રીય હિન્દુ પરિષદ દેશવ્યાપી આંદોલન શરૂ કરશે. "રામના નામે છેતરપિંડી કરનારાઓને કોઈપણ કાળે છોડવામાં નહીં આવે," તેમ તેમણે ઉમેર્યું.

ઉલ્લેખનીય છે કે છેલ્લા કેટલાક દિવસોથી રામમંદિર ટ્રસ્ટમાં જમીન ખરીદી અને દાનની રકમને લઈને અનેક સવાલો ઉઠી રહ્યા છે, જેના પગલે હિન્દુ સંગઠનોમાં ભારે રોષ જોવા મળી રહ્યો છે.