કિશ્તવાડ : જમ્મુ અને કાશ્મીરના સંવેદનશીલ પર્વતીય જિલ્લા કિશ્તવાડના અંતરિયાળ વિસ્તારમાંથી સ્થાનિક પોલીસના બે ખાસ પોલીસ અધિકારીઓ (SPO) રહસ્યમય સંજોગોમાં ગુમ થઈ જતાં સુરક્ષા એજન્સીઓમાં ભારે દોડધામ મચી ગઈ છે. સ્થાનિક પોલીસના સ્પેશિયલ ઓપરેશન ગ્રુપ (SOG) માં તૈનાત એસપીઓ રશપાલ કુમાર અને બાબી ચંદ બુધવારે અચાનક લાપતા થઈ ગયા હોવાના અહેવાલ મળ્યા છે. સેના અને સ્થાનિક પોલીસ દ્વારા દુર્ગમ પહાડી વિસ્તારમાં બંને અધિકારીઓની શોધખોળ માટે મોટા પાયે સંયુક્ત સર્ચ ઓપરેશન હાથ ધરવામાં આવ્યું છે.

સેનાના ઉચ્ચ અધિકારીઓ દ્વારા આપવામાં આવેલી વિગતો અનુસાર, ગુમ થયેલા બંને અધિકારીઓ પર્વતીય જિલ્લાના અત્યંત દૂરાંત અને દુર્ગમ ગણાતા દછન-મારવાહ પટ્ટામાંથી ગુમ થયા છે. આ ઘટના બાદ તુરંત જ સમગ્ર વિસ્તારને સીલ કરી દેવામાં આવ્યો છે તથા વધારાની સુરક્ષા ટુકડીઓ તૈનાત કરીને ઘનઘોર જંગલો અને પહાડી વિસ્તારો ખૂંદવામાં આવી રહ્યા છે. સ્થાનિક સ્તરે સંચાર વ્યવસ્થા અને અન્ય માહિતીના આધારે પણ બંને જવાનોનો સુરાગ મેળવવા પ્રયાસો ચાલી રહ્યા છે.

ઉલ્લેખનીય છે કે, કિશ્તવાડમાં આ અધિકારીઓ ગુમ થયા તે જ દિવસે દક્ષિણ કાશ્મીરના કુલગામ જિલ્લામાં સીઆરપીએફ (CRPF) ની ચોકી પર એક ભયાનક આંતકવાદી હુમલો થયો હતો. બપોરે આશરે 2:15 વાગ્યાના સુમારે અજાણ્યા બાઇક સવાર આતંકવાદીઓએ સુરક્ષાદળોની ચોકીને નિશાન બનાવીને અંધાધૂંધ ગોળીબાર કર્યો હતો, જેમાં ફરજ પર તૈનાત 3 જવાનો ગંભીર રીતે ઘાયલ થયા હતા અને ફાયરિંગ કર્યા બાદ હુમલાખોરો ઝડપથી ફરાર થઈ ગયા હતા.

કુલગામમાં થયેલા આતંકવાદી હુમલા અને કિશ્તવાડમાંથી બે જવાનોના ગુમ થવાની ઘટનાઓ બાદ સમગ્ર ઘાટીમાં હાઇ એલર્ટ જાહેર કરી દેવામાં આવ્યું છે. સેના અને કાશ્મીર પોલીસ હવે એ દિશામાં તપાસ કરી રહી છે કે શું આ અધિકારીઓના ગુમ થવા પાછળ કોઈ આતંકી ષડયંત્ર છે કે પછી તેઓ પહાડી વિસ્તારના વિષમ વાતાવરણમાં ફસાયા છે. આગામી સમયમાં આ સમગ્ર વિસ્તારમાં ઘૂસણખોરી રોકવા અને હુમલાખોરોને પકડી પાડવા માટે સઘન તપાસ ઝુંબેશ ચાલુ રાખવામાં આવશે.