લખનૌ:  આગામી ૨૦૨૭ની ઉત્તર પ્રદેશ વિધાનસભા ચૂંટણીને લઈને રાજ્યના રાજકારણમાં અત્યારથી જ ગરમાવો આવી ગયો છે. અહેવાલો અનુસાર, ગઠબંધન હેઠળ સીટ વહેંચણીના મુદ્દાને ઉકેલવા માટે આગામી ૧૭ નવેમ્બરના રોજ સમાજવાદી પાર્ટી (સપા) અને કોંગ્રેસના વરિષ્ઠ નેતાઓ વચ્ચે એક અત્યંત મહત્વપૂર્ણ બેઠક યોજાવા જઈ રહી છે. આ બેઠકમાં સપા પ્રમુખ અખિલેશ યાદવ પોતે હાજર રહીને કોંગ્રેસના દિગ્ગજ નેતાઓ સાથે સીધો સંવાદ કરશે. સૂત્રોના જણાવ્યા મુજબ, બંને પક્ષો વચ્ચે આગામી ચૂંટણી માટેની ચોક્કસ ફોર્મ્યુલા નક્કી કરવા પર ઊંડાણપૂર્વક ચર્ચા કરવામાં આવશે, જે યુપીના આગામી રાજકીય સમીકરણો નક્કી કરવામાં નિર્ણાયક સાબિત થશે.

બીજી તરફ, ઔપચારિક બેઠક શરૂ થાય તે પહેલાં જ બંને પક્ષો તરફથી દબાણની રાજનીતિ તેજ બની છે. અહેવાલોમાં જણાવ્યા મુજબ, કોંગ્રેસ પાર્ટીએ રાજ્યની કુલ ૪૦૩ વિધાનસભા બેઠકોમાંથી ૨૦૦થી વધુ બેઠકો પર પોતાનો દાવો રજૂ કરીને ગઠબંધનમાં 'સમાન ભાગીદાર' બનવાની માંગ કરી છે. કોંગ્રેસની આ માંગ સામે સમાજવાદી પાર્ટીએ પણ પોતાની રણનીતિ મજબૂત કરી લીધી છે. સપાના સૂત્રો અનુસાર, પાર્ટીએ કોંગ્રેસના દાવાઓને પહોંચી વળવા માટે ૨૦૨૨ની વિધાનસભા ચૂંટણીના આંકડાઓના આધારે એક ખાસ ડોઝિયર તૈયાર કર્યું છે, જેના થકી સપા સ્પષ્ટ સંદેશ આપવા માંગે છે કે બેઠકોની ફાળવણી માત્ર સંખ્યાબળના આધારે નહીં, પરંતુ ઉમેદવારની 'જીતવાની ક્ષમતા' પર જ થવી જોઈએ.

સમાજવાદી પાર્ટી દ્વારા તૈયાર કરવામાં આવેલા ૨૦૨૨ના ચૂંટણી વિશ્લેષણ મુજબ, ગત વિધાનસભા ચૂંટણીમાં કોંગ્રેસનું પ્રદર્શન અત્યંત નબળું રહ્યું હતું. અહેવાલોમાં ટાંકવામાં આવેલા આંકડા દર્શાવે છે કે ૨૦૨૨માં કોંગ્રેસે ૩૯૯ બેઠકો પર ઉમેદવારો ઉભા રાખ્યા હતા, જેમાંથી માત્ર બે જ બેઠકો (પ્રતાપગઢની રામપુર ખાસ અને મહારાજગંજની ફરેન્ડા) પર જીત મેળવી શકી હતી અને ચાર બેઠકો પર બીજા સ્થાને રહી હતી. આશ્ચર્યજનક રીતે ૩૮૭ બેઠકો પર કોંગ્રેસના ઉમેદવારોની ડિપોઝીટ જપ્ત થઈ હતી અને સમગ્ર રાજ્યમાં પાર્ટીને માત્ર ૨૧.૫૧ લાખ મત મળ્યા હતા, જેમાં ફક્ત ૪૬ બેઠકો પર જ પાર્ટી ૧૦,૦૦૦થી વધુ મત મેળવી શકી હતી. આ આંકડાકીય હકીકતોને આગળ ધરીને ૧૭ નવેમ્બરની બેઠકમાં અખિલેશ યાદવ કોંગ્રેસની ૨૦૦ બેઠકોની માંગ પર કેવો વળતો પ્રહાર કરે છે, તેના પર સૌની નજર ટકેલી છે.