નવી દિલ્હી: સંસદના વિશેષ સત્રમાં જ્યારે દેશના ભવિષ્ય અને મહિલાઓના અધિકારો પર ચર્ચા થઈ રહી હતી, ત્યારે અચાનક રાજકીય આક્ષેપબાજીને કારણે વાતાવરણ ગરમાયું હતું. શિવસેના (UBT) ના સાંસદ પ્રિયંકા ચતુર્વેદીએ ભાજપના નેતા નિશિકાંત દુબે દ્વારા આદિત્ય ઠાકરે વિરુદ્ધ કરવામાં આવેલા 'પાયાવિહોણા' આરોપોની આકરી ટીકા કરી છે. ચતુર્વેદીએ આ નિવેદનને અત્યંત અપમાનજનક ગણાવીને દુબે પાસે જાહેરમાં માફી માંગવાની માંગ કરી છે.
કુલદીપ સેંગરના મુદ્દે જામી જંગ
આ વિવાદની શરૂઆત ત્યારે થઈ જ્યારે UBT નેતા અરવિંદ સાવંતે મહિલા અનામત બિલ પર બોલતી વખતે ભાજપના નેતાઓ પર પ્રહારો કર્યા. સાવંતે કુલદીપ સેંગર અને બ્રિજભૂષણ શરણ સિંહના નામનો ઉલ્લેખ કરતા સવાલ ઉઠાવ્યો હતો કે મહિલા સુરક્ષાની વાતો કરનારાઓ આ નેતાઓ વિશે કેમ મૌન છે? આ સાંભળતા જ ભાજપના સાંસદો ઉભા થઈ ગયા હતા અને વળતા આક્ષેપો શરૂ કર્યા હતા.
"વાહિયત સે વાહિયત આરોપ..."
ભાજપના સાંસદ નિશિકાંત દુબેએ આ દરમિયાન આદિત્ય ઠાકરે પર કેટલીક વાંધાજનક ટિપ્પણીઓ કરી હતી. આ બાબતે રોષે ભરાયેલા પ્રિયંકા ચતુર્વેદીએ કહ્યું કે, "ભાજપના નેતાઓ અત્યંત વાહિયાત આરોપો લગાવી રહ્યા છે. શું તમે સંસદમાં બેસીને કોઈની પણ નિંદા કરી શકો છો?" અરવિંદ સાવંતે પણ સ્પીકરને વિનંતી કરી હતી કે આ અપમાનજનક શબ્દોને સંસદીય કાર્યવાહીમાંથી હટાવી દેવામાં આવે.
PM મોદીનું ‘મહિલા શક્તિ’ પર ભાર
એક તરફ જ્યારે સંસદમાં આ તુ-તુ-મેં-મેં ચાલી રહી હતી, ત્યારે વડાપ્રધાન નરેન્દ્ર મોદીએ રાષ્ટ્રીય નીતિનિર્માણમાં મહિલાઓના સમાવેશ માટે જોરદાર વકીલાત કરી હતી. તેમણે તમામ પક્ષોને અપીલ કરી હતી કે તેઓ 'ટેકનિકલ મુદ્દાઓ' પાછળ છુપાયા વગર સર્વસંમતિથી મહિલા અનામત બિલ પસાર કરે. પીએમએ આ સુધારા માટે તમામ પક્ષોને શ્રેય લેવાની પણ ઓફર કરી હતી.
આગામી ત્રણ દિવસ મહત્વના
સંસદનું આ ખાસ સત્ર ૧૬ થી ૧૮ એપ્રિલ સુધી ચાલવાનું છે. આ દરમિયાન માત્ર મહિલા અનામત બિલ જ નહીં, પણ ૧૩૧મો બંધારણીય સુધારો, કેન્દ્રશાસિત પ્રદેશોના કાયદામાં ફેરફાર અને સીમાંકન બિલ (Delimitation Bill) જેવા મહત્વના મુદ્દાઓ પર ચર્ચા થવાની છે.
રાજકીય વિશ્લેષકો માને છે કે ચૂંટણીના વર્ષમાં આ બિલો પાસ કરાવીને સરકાર એક મોટો દાવ ખેલવા જઈ રહી છે, પરંતુ વિપક્ષના આકરા તેવર જોતા આગામી બે દિવસ પણ સંસદમાં હંગામો ચાલુ રહે તેવા પૂરેપૂરા સંકેતો છે.
પ્રિયંકા ચતુર્વેદીનો પ્રહાર: "સંસદની ગરિમા જળવાવી જોઈએ, પાયાવિહોણા નિવેદનો કરીને કોઈના ચારિત્ર્ય પર કાદવ ઉછાળવો એ શરમજનક છે."