વોશિંગ્ટન | તા. 27: મધ્ય પૂર્વમાં ચાલી રહેલા તણાવ અને યુએસ-ઈરાન વચ્ચેના સંભવિત સંઘર્ષના માહોલમાં અમેરિકાના વરિષ્ઠ રિપબ્લિકન સેનેટર લિન્ડસે ગ્રેહામે પાકિસ્તાન સામે લાલ આંખ કરી છે. સેનેટર ગ્રેહામે સ્પષ્ટ શબ્દોમાં જણાવ્યું છે કે મધ્યસ્થી તરીકે પાકિસ્તાનની ભૂમિકા હંમેશાથી સમસ્યારૂપ રહી છે અને ઈઝરાયલ પ્રત્યેનો તેમનો જૂનો દુશ્મનાવટભર્યો અભિગમ આંતરરાષ્ટ્રીય શાંતિ માટે અવરોધરૂપ છે. ગ્રેહામની આ આકરી પ્રતિક્રિયા પાકિસ્તાનના સંરક્ષણ પ્રધાન ખ્વાજા આસિફના તે નિવેદન બાદ આવી છે, જેમાં તેમણે સ્પષ્ટ કર્યું હતું કે પાકિસ્તાન 'અબ્રાહમ કરાર' (Abraham Accords) માં જોડાવાના પક્ષમાં નથી.
શું છે વિવાદનું મૂળ?
પાકિસ્તાનના સંરક્ષણ પ્રધાને પુનરોચ્ચાર કર્યો હતો કે જ્યાં સુધી પેલેસ્ટિનિયન રાજ્યની સ્થાપના ન થાય અને પૂર્વ જેરુસલેમને તેની રાજધાની માનવામાં ન આવે, ત્યાં સુધી પાકિસ્તાન ઈઝરાયલને સ્વીકારશે નહીં. આ વલણ પર પ્રહાર કરતા સેનેટર ગ્રેહામે સોશિયલ મીડિયા પર જણાવ્યું હતું કે, "પાકિસ્તાન રાષ્ટ્રપતિ ડોનાલ્ડ ટ્રમ્પના અબ્રાહમ કરારમાં જોડાવાના આહ્વાનનો હવે જવાબ આપે તે અત્યંત અનિવાર્ય છે." ગ્રેહામે વધુમાં આક્ષેપ કર્યો હતો કે ઈરાની લશ્કરી વિમાનોનો પાકિસ્તાની એરબેઝ પર ઉપયોગ થવાના અહેવાલો અત્યંત ચિંતાજનક છે, જે પાકિસ્તાનની મધ્યસ્થતાની વિશ્વસનીયતા પર મોટા પ્રશ્નાર્થ ચિહ્નો ઉભા કરે છે.
વૈશ્વિક રાજકારણમાં ગરમાવો:
રિપબ્લિકન નેતા લિન્ડસે ગ્રેહામનું આ નિવેદન એવા સમયે આવ્યું છે જ્યારે વૈશ્વિક સ્તરે ઈરાન-ઈઝરાયલ સંઘર્ષને લઈને રાજદ્વારી સમીકરણો બદલાઈ રહ્યા છે. ગ્રેહામના જણાવ્યા અનુસાર, પાકિસ્તાનના ઉચ્ચ અધિકારીઓના ઈઝરાયલ વિરુદ્ધના ભૂતકાળના નિવેદનો અને વર્તમાન વલણ એ સાબિત કરે છે કે તેઓ પક્ષપાતી છે, જેના કારણે મધ્યસ્થી તરીકે તેમની કોઈ પણ ભૂમિકા અમેરિકા કે ઈઝરાયલ માટે સ્વીકાર્ય નથી.
આ નિવેદનો બાદ આંતરરાષ્ટ્રીય રાજનીતિના વર્તુળોમાં ચર્ચા છે કે શું આ પાકિસ્તાન અને અમેરિકા વચ્ચેના કૂટનીતિક સંબંધોમાં નવો વળાંક લાવશે? સેનેટર ગ્રેહામના આ આકરા તેવર દર્શાવે છે કે આવનારા સમયમાં અમેરિકા પોતાના સાથી દેશો પાસેથી વધુ સ્પષ્ટ અને ઈઝરાયલ સાથેના સંબંધો સુધારવાની અપેક્ષા રાખી રહ્યું છે, જેમાં પાકિસ્તાન માટે 'તટસ્થ' રહેવું હવે મુશ્કેલ બની રહ્યું છે.