તાશ્કંદ:ઉઝબેકિસ્તાનની બે દિવસીય દ્વિપક્ષીય મુલાકાતે પહોંચેલા ભારતના વડા પ્રધાન નરેન્દ્ર મોદીનું તાશ્કંદમાં અત્યંત ભાવભીનું અને યાદગાર સ્વાગત કરવામાં આવ્યું હતું. તાશ્કંદ પહોંચ્યા બાદ આયોજિત ખાસ સાંસ્કૃતિક કાર્યક્રમમાં સ્થાનિક ઉઝબેક બાળકોએ બોલીવુડની દિગ્ગજ ગાયિકા આશા ભોંસલેના સદાબહાર ગીત "ઉડે જબ જબ ઝુલ્ફેન તેરી..." પર મનોહર નૃત્ય પ્રદર્શન રજૂ કરીને સૌને દંગ કરી દીધા હતા. બાળકોના સ્ટેપ અને ભારતીય સંગીત પ્રત્યેનો તેમનો ઉત્સાહ જોઈને પીએમ મોદી જાતે મંત્રમુગ્ધ થઈ ગયા હતા. તેમણે સ્ટેજ નજીક ઉભા રહીને કલાકારોને બિરદાવ્યા હતા અને પ્રોગ્રામ પૂરો થતાં જ તમામ બાળકો સાથે હેતપૂર્વક વાતચીત કરી તેમના પર આશીર્વાદ વરસાવ્યા હતા.

આ મનમોહક ક્ષણોનો વિડીયો અને તસવીરો સોશિયલ મીડિયા પર શેર કરતાં પીએમ મોદીએ ઉઝબેકિસ્તાન સાથેના આત્મીય સંબંધોની પ્રશંસા કરી હતી. આ કાર્યક્રમમાં માત્ર બોલીવુડ જ નહીં, પરંતુ ભારતીય શાસ્ત્રીય નૃત્ય કથક અને સ્થાનિક 'અંદિજાન પોલ્કા' નું સુંદર ફ્યુઝન જોવા મળ્યું હતું, જેણે ભારત અને મધ્ય એશિયા વચ્ચેના પ્રાચીન સાંસ્કૃતિક તંતુઓને પુનઃજીવંત કર્યા હતા. લાલ બહાદુર શાસ્ત્રી સેન્ટરના વિદ્યાર્થીઓએ પણ કથકની શાનદાર પ્રસ્તુતિ કરી હતી. કાર્યક્રમ દરમિયાન હાજર રહેલા ભારતીય સમુદાયના લોકોએ ત્રિરંગો લહેરાવીને અને તાળીઓના ગડગડાટથી વાતાવરણને ગુંજવી મૂક્યું હતું.

આ મુલાકાત દરમિયાન ઉઝબેકિસ્તાનના રાષ્ટ્રપતિ શવકત મિર્ઝીયોયેવે પીએમ મોદીને પોતાના દેશના સર્વોચ્ચ નાગરિક સન્માન "ઓલી દારાજલી દોસ્તલિક" (ઉચ્ચ સ્તરીય મિત્રતા એવોર્ડ) થી નવાજ્યા હતા. આ પીએમ મોદીને મળેલી ૩૬મી આંતરરાષ્ટ્રીય ટ્રોફી/સન્માન છે. પોતાના પ્રવાસ દરમિયાન પીએમ મોદીએ તાશ્કંદમાં આયોજિત યોગ સત્રમાં ભાગ લઈ સ્થાનિક લોકોને યોગાસન શીખવ્યા હતા અને બાદમાં તાશ્કંદ સ્થિત લાલ બહાદુર શાસ્ત્રી સ્મારક તથા મહાત્મા ગાંધી કેન્દ્રની મુલાકાત લઈને શ્રદ્ધાંજલિ અર્પિત કરી હતી.