તા. ૨૫ નવેમ્બરે ર૦ર૫ વિક્રમ સંવત ર૦૮૨ માગશર સુદ – ૫ મંગળવાર
વીડી સતીસન બનશે કેરળના નવા મુખ્યમંત્રી
વેણુગોપાલ અને ચેન્નીથલા જેવા દિગ્ગજોને પાછળ છોડયાઃ રાહુલ ગાંધીના વિશ્વાસુ ગણાતા
તિરુવનંતપુરમ, તા.૧૪: કેરળના રાજકારણમાં એક મોટા પરિવર્તનના સંકેત આપતા કોંગ્રેસ હાઈકમાન્ડે વી.ડી. સતીસન પર પસંદગીનો કળશ ઢોળ્યો છે. ૨૦૨૬ની વિધાનસભા ચૂંટણીમાં યુનાઈટેડ ડેમોક્રેટિક ફ્રન્ટના શાનદાર વિજય બાદ, મુખ્યમંત્રી પદ માટે અનેક દિગ્ગજ નામો ચર્ચામાં હતા, પરંતુ રાહુલ ગાંધીએ સતીસનની પાયાના સ્તરની પક્કડ અને તેમની કાર્યક્ષમતા પર ભરોસો મૂકયો છે. વડસેરી દામોદરન સતીસન, જેઓ અત્યાર સુધી વિપક્ષના નેતા તરીકે ડાબેરી સરકાર સામે સિંહગર્જના કરતા હતા, તેઓ હવે સત્તાવાર રીતે રાજ્યના વહીવટની ધુરા સંભાળશે. આ નિમણૂક સાથે જ કોંગ્રેસે સંકેત આપ્યો છે કે હવે પક્ષમાં અનુભવની સાથે પરિવર્તન અને યુવા જોશને પ્રાધાન્ય આપવામાં આવશે.
વી.ડી. સતીસન ની રાજકીય સફર કોઈ ફિલ્મી પટકથાથી કમ નથી. કોચીના નેટ્ટૂરમાં જન્મેલા સતીસને ૧૯૮૦ના દાયકામાં વિદ્યાર્થી રાજકારણથી શરૂઆત કરી હતી. વ્યવસાયે વકીલ એવા સતીસન ૨૦૦૧થી સતત પરાવુર બેઠક પરથી ધારાસભ્ય તરીકે ચૂંટાતા આવ્યા છે, જે તેમની પ્રજામાં લોકપ્રિયતાની સાક્ષી પૂરે છે. તેમની સૌથી મોટી તાકાત તેમની અભ્યાસુ વક્તા તરીકેની છબી છે; વિધાનસભામાં ડેટા અને પુરાવા સાથે સરકારને ઘેરવાની તેમની શૈલીએ તેમને હાઈકમાન્ડની નજરમાં ‘હીરો'બનાવી દીધા હતા. કે.સી. વેણુગોપાલ જેવા રાષ્ટ્રીય કદના નેતાઓની હાજરી છતાં, સતીસનની કાર્યકરો વચ્ચેની મજબૂત પકડ અને સામાન્ય જનતા સાથેના જોડાણે તેમને રેસમાં સૌથી આગળ રાખ્યા હતા.
નવા મુખ્યમંત્રી સામે હવે કેરળના દેવા, બેરોજગારી અને વિકાસલક્ષી પડકારોનો સામનો કરવાની જવાબદારી છે. સતીસન તેમની સાદગી અને પારદર્શક કાર્યશૈલી માટે જાણીતા છે, જે કેરળના શિક્ષિત મતદારોને આકર્ષવામાં સફળ રહી છે. રાહુલ ગાંધીના તેઓ અત્યંત નજીક હોવાથી કેન્દ્ર અને રાજ્ય વચ્ચેના સમન્વયમાં પણ તેમને સરળતા રહેશે તેવું મનાય છે. આ નિમણૂક માત્ર કેરળ પૂરતી મર્યાદિત નથી, પરંતુ દક્ષિણ ભારતમાં કોંગ્રેસના પુનરુત્થાન માટે એક માસ્ટરસ્ટ્રોક માનવામાં આવી રહી છે. હવે જોવાનું એ રહેશે કે ‘વકીલમાંથી મુખ્યમંત્રી'બનેલા સતીસન કેરળના ભવિષ્યને કઈ નવી દિશામાં લઈ જાય છે.(
(3:10 PM IST)
છેલ્લા 8 દિવસમાં સૌથી લોકપ્રિય 
