ભોપાલ: મધ્ય પ્રદેશના જબલપુર પાસે બરગી ડેમના નદી વિસ્તારમાં સર્જાયેલી હૃદયદ્રાવક બોટ દુર્ઘટનામાં અનેક લોકોએ જીવ ગુમાવ્યા હતા, પરંતુ એક નવજાત બાળક તે સમયે મોતના મોઢામાંથી સુરક્ષિત બહાર આવ્યું હતું. આ ‘મિરેકલ ચાઈલ્ડ’ હવે એક વર્ષનો થઈ ગયો છે અને તેના પ્રથમ જન્મદિવસે પરિવારજનોની આંખોમાં હર્ષ અને આઘાતના મિશ્રિત આંસુ જોવા મળ્યા હતા.
કાળમુખી દુર્ઘટના અને એ ચમત્કાર
ગયા વર્ષે જ્યારે આ પ્રવાસન સ્થળ પર બોટ પલટી ગઈ હતી, ત્યારે હોબાળો મચી ગયો હતો. આ દુર્ઘટનામાં માસૂમ બાળકે પોતાના માતા-પિતાને ગુમાવ્યા હતા. પરંતુ નદી કિનારે કામ કરી રહેલા બિહારના કેટલાક શ્રમિકોએ પોતાની જાનની પરવા કર્યા વગર પાણીમાં ઝંપલાવ્યું હતું. આ ‘દેવદૂતો’ એ ઊંડા પાણીમાંથી બાળકને બહાર કાઢ્યો હતો અને તેને નવજીવન આપ્યું હતું.
સાદગીપૂર્ણ ઉજવણી અને શ્રમિકોનું સન્માન
આજે બાળકના જન્મદિને કોઈ ધામધૂમ કરવાને બદલે પરિવારે શાંતિપૂર્ણ રીતે પ્રાર્થના કરી હતી. મધ્ય પ્રદેશ સરકાર દ્વારા પણ તે શૂરવીર શ્રમિકોને રૂ. 51-51 હજારનું ઇનામ આપીને સન્માનિત કરવામાં આવ્યા હતા, જેમણે આ બાળકનો જીવ બચાવવા માટે માનવતાનું ઉત્તમ ઉદાહરણ પૂરું પાડ્યું હતું.
જિંદગીનો નવો અધ્યાય
પરિવાર માટે આ દિવસ ખૂબ જ ભાવુક રહ્યો હતો. એક તરફ વ્હાલસોયા બાળકના એક વર્ષ પૂર્ણ થવાની ખુશી હતી, તો બીજી તરફ તે દુર્ઘટનાની કાળી યાદો તાજી થઈ ગઈ હતી. હાલમાં આ બાળક તેના સંબંધીઓના આશ્રય હેઠળ ઉછરી રહ્યો છે, જેઓ તેને તેના માતા-પિતાની ખોટ ન સાલે તે માટે પૂરા પ્રયાસો કરી રહ્યા છે.