તા. ૧ ડિસેમ્બર ર૦ર૫ વિક્રમ સંવત ર૦૮૨ માગશર સુદ – ૧૧ સોમવાર
જંગ સમાપ્ત!! હવે વિકાસ ઉપર ધ્યાન દેશે ઇરાન
સર્વોચ્ચ નેતાએ સંસદ સમક્ષ રજુ કર્યો માસ્ટરપ્લાન
તહેરાન તા.૨૯: ઈરાનના સર્વોચ્ચ નેતા, આયાતુલ્લાહ મોજતબા ખામેનીએ ગુરુવારે દેશની સંસદને સંબોધિત કરતા યુદ્ધ પછીની પરિસ્થિતિમાં આર્થિક શક્તિ અને રાષ્ટ્રીય એકતા પર ભાર મૂક્યો. સંસદના વર્તમાન કાર્યકાળની ત્રીજી વર્ષગાંઠ નિમિત્તે જારી કરાયેલા સંદેશમાં, તેમણે જણાવ્યું હતું કે સંસદ હવે દેશની આર્થિક સ્થિરતા અને પુનર્નિર્માણ માટે એક મજબૂત પાયો બનવી જોઈએ.
આયાતુલ્લાહ ખામેનીએ જણાવ્યું હતું કે સંસદના સભ્યોએ આર્થિક સ્થિરતા, ફુગાવા નિયંત્રણ, રોકડ વ્યવસ્થાપન, ઉત્પાદન વધારવું અને સાતમી વિકાસ યોજનામાં સુધારો કરવો જોઈએ. તેમણે એમ પણ કહ્યું હતું કે બીજા અને ત્રીજા યુદ્ધમાં થયેલા નુકસાન માટે વળતર અને પુનર્નિર્માણ સંબંધિત જોગવાઈઓ યોજનામાં શામેલ હોવી જોઈએ. તેમણે સોશિયલ મીડિયા પ્લેટફોર્મ હ્ પર જણાવ્યું હતું કે વર્તમાન પરિસ્થિતિ અને યુદ્ધ પછીના સમયગાળામાં સરકાર અને અન્ય સંસ્થાઓ માટે સ્પષ્ટ રોડમેપ તૈયાર કરવો જરૂરી છે.
ઈરાનના સર્વોચ્ચ નેતાએ જણાવ્યું હતું કે સંસદના સભ્યોએ દેશને આધુનિક બનાવવા, રોજગાર વધારવા, ઉત્પાદનને મજબૂત બનાવવા અને લોકોની આર્થિક સમસ્યાઓનું નિરાકરણ લાવવા પર સંપૂર્ણ ધ્યાન કેન્દ્રિત કરવા માટે સરકાર સાથે કામ કરવું જોઈએ. તેમણે વિજ્ઞાન, ઉદ્યોગ, સંસ્કૃતિ અને નૈતિક મૂલ્યોને આગળ વધારવા તેમજ નાણાકીય ભ્રષ્ટાચાર અને ફુગાવાને નિયંત્રિત કરવાની જરૂરિયાત પર ભાર મૂક્યો હતો. ખામેનીએ જણાવ્યું હતું કે દેશમાંથી ગરીબી અને વંચિતતાને દૂર કરવા માટે દરેકે સાથે મળીને કામ કરવું જોઈએ.
ખામેનીએ બધા ઈરાનીઓને એક રહેવાની અપીલ કરી હતી. તેમણે જણાવ્યું હતું કે દેશની સ્વતંત્રતા અને ગૌરવ માટે, દરેક નાગરિકે રાષ્ટ્રીય એકતા જાળવવા માટે કામ કરવું જોઈએ. તેમણે ભાર મૂક્યો હતો કે મતભેદોને સંઘર્ષ અને વિભાજનમાં પરિવર્તિત ન કરવા જોઈએ, પરંતુ દરેકે એકતા અને ભાઈચારોનો સંદેશ ફેલાવવો જોઈએ.
ઈરાનના સર્વોચ્ચ નેતાએ આરોપ લગાવ્યો હતો કે યુદ્ધ, આર્થિક દબાણ અને રાજકીય ઘેરાબંધી પછી, દુશ્મનો દેશની અંદર વિભાજન બનાવવાનો પ્રયાસ કરી રહ્યા છે. તેમણે કહ્યું હતું કે વિરોધી શક્તિઓ ઈરાનને નબળા બનાવવા માટે સામાજિક વિભાજન બનાવીને લશ્કરી હારની ભરપાઈ કરવાનો પ્રયાસ કરે છે.
આ દરમિયાન, યુએસ સેન્ટ્રલ કમાન્ડ (સેન્ટકોમ) એ દાવો કર્યો હતો કે ઈરાને ૨૭ મેની રાત્રે કુવૈત તરફ બેલિસ્ટિક મિસાઇલ છોડ્યું હતું, જેને કુવૈતી સૈન્ય દ્વારા સફળતાપૂર્વક અટકાવવામાં આવ્યું હતું. સેન્ટકોમ અનુસાર, ઈરાની દળોએ અગાઉ હોર્મુઝ સ્ટ્રેટની આસપાસ પાંચ ડ્રોન છોડ્યા હતા, જેને યુએસ દળો દ્વારા તોડી પાડવામાં આવ્યા હતા. યુએસ સૈન્યએ બંદર અબ્બાસમાં એક નિયંત્રણ કેન્દ્રથી બીજા ડ્રોન છોડવાનું પણ અટકાવ્યું હતું.
સંયુક્ત આરબ અમીરાત, કતાર અને સાઉદી અરેબિયાએ કુવૈતમાં યુએસ એરબેઝ પર મિસાઇલ હુમલાની નિદા કરી છે. આ દેશોએ તેને કુવૈતની સાર્વભૌમત્વનું સ્પષ્ટ ઉલ્લંઘન ગણાવ્યું છે. UAE એ તેના નિવેદનમાં સીધા ઈરાનનું નામ લીધું છે, હુમલાઓને આતંકવાદી કૃત્ય ગણાવ્યું છે. ત્રણેય દેશોએ કુવૈત સાથે એકતા વ્યક્ત કરી છે અને તેની સુરક્ષા અને સ્થિરતા જાળવવા માટે જરૂરી તમામ પગલાંને સમર્થન આપવાનું વચન આપ્યું છે
(10:20 AM IST)
છેલ્લા 8 દિવસમાં સૌથી લોકપ્રિય 
