તેહરાન:  મધ્ય પૂર્વમાં વધતા ભારે ભૌગોલિક-વ્યૂહાત્મક તણાવ વચ્ચે ઈરાનના ઇસ્લામિક રિવોલ્યુશનરી ગાર્ડ કોર્પ્સ  એ યુનાઇટેડ સ્ટેટ્સ અને પશ્ચિમી તાકાતોને પડકાર ફેંકતો એક સનસનાટીપૂર્ણ દાવો કર્યો છે. IRGC એરોસ્પેસ ડિવિઝનના પ્રવક્તા જનરલ મોહમ્મદીએ જાહેરાત કરી છે કે ઈરાન હવે માત્ર લશ્કરી શસ્ત્રોનો આયાતકાર નથી રહ્યો, પરંતુ એક મોટો નિકાસકાર બની ચૂક્યો છે. તેમણે દાવો કર્યો હતો કે વિશ્વની સૌથી મોટી સૈન્ય શક્તિ ગણાતું અમેરિકા પણ ઈરાનના ઘાતક 'શાહેદ-136' (Shahed-136) કામિકાઝે ડ્રોનની તકનીક અને ડિઝાઈનની નકલ કરવા મજબૂર બન્યું છે. ઈરાને પોતાની હવાઈ ટેકનોલોજી અને ઇલેક્ટ્રોનિક વોરફેર સિસ્ટમમાં દુશ્મન દેશો કરતાં અનેક ગણી શ્રેષ્ઠતા મેળવી લીધી હોવાનો દાવો કર્યો છે.

પ્રવક્તાના જણાવ્યા અનુસાર, ઈરાને સંઘર્ષ અને દુશ્મનના ભારે બોમ્બમારા વચ્ચે પણ મિસાઈલ અને ડ્રોન ઉત્પાદન ચાલુ રાખવા માટે અત્યંત લવચીક અને સુરક્ષિત ભૂગર્ભ સુવિધાઓ (અંડરગ્રાઉન્ડ ફેસિલિટીઝ) તૈયાર કરી લીધી છે. તાજેતરમાં જ ઈરાની સંરક્ષણ દળોએ દુશ્મનના સાત MQM-170 રિકોનિસન્સ ડ્રોનને સફળતાપૂર્વક તોડી પાડીને પોતાની એર ડિફેન્સ ક્ષમતા સાબિત કરી છે. જનરલ મોહમ્મદીએ ભારપૂર્વક કહ્યું કે, સંઘર્ષની આગામી લહેરમાં IRGC એવા ગૂઢ અને અણધાર્યા આક્રમક વિકલ્પો જાહેર કરશે જેની કલ્પના પણ અમેરિકા કે તેના સહયોગી દેશોએ કરી નહીં હોય. આ સાથે જ ટૂંક સમયમાં ઈરાન પોતાની રહસ્યમય 'મિસાઈલ સીટી' દેશની જનતા સામે અનાવરિત કરશે.

જનરલ મોહમ્મદીએ પશ્ચિમી વિશ્વને રોકડું સંભળાવતા કહ્યું કે હવે વિશ્વએ ઈરાનને એક નવી સૈન્ય "મહાસત્તા"  તરીકે સ્વીકારવું જ પડશે. જો દુશ્મન દેશ કોઈ પણ પ્રકારની લશ્કરી ભૂલ કરશે, તો ઈરાનનો પ્રતિકાર એટલો પ્રચંડ અને આકરો હશે કે તે દુશ્મનને વર્ષો સુધી અસમર્થ અને અપંગ બનાવી દેશે. સંપૂર્ણપણે સ્થાનિક જ્ઞાન અને આત્મનિર્ભરતાથી બનેલા વાયુસેનાના હથિયારો સાથે ઈરાન કોઈપણ આક્રમણનો સખત જવાબ આપવા માટે તૈયાર છે. આ સિંહગર્જનાએ સમગ્ર મધ્ય પૂર્વ અને પશ્ચિમી દેશોની લશ્કરી છાવણીઓમાં ભારે ખળભળાટ મચાવી દીધો છે.