કોલકાતા : પશ્ચિમ બંગાળના રાજકારણમાં ભારે ચર્ચા જગાવનારા એક હાઈ-પ્રોફાઈલ કેસમાં આજે તૃણમૂલ કોંગ્રેસ (TMC) ના વરિષ્ઠ નેતા અને સાંસદ અભિષેક બેનર્જી કાયદાકીય સકંજામાં ઘેરાયેલા જોવા મળ્યા હતા. પશ્ચિમ બંગાળ વિધાનસભા ચૂંટણી પ્રચાર દરમિયાન તેમના દ્વારા આપવામાં આવેલા કથિત ધાકધમકીભર્યા ભાષણની તપાસના સંદર્ભમાં, તેઓ બુધવારે કોલકાતા નજીક આવેલી બિધાનનગર SDJM કોર્ટમાં મેજિસ્ટ્રેટ સમક્ષ રૂબરૂ હાજર થયા હતા. આ દરમિયાન કોર્ટ પરિસરમાં કડક તબીબી અને ન્યાયિક દેખરેખ હેઠળ નિષ્ણાતોની હાજરીમાં તેમનો 'વૉઇસ સેમ્પલ' (અવાજનો નમૂનો) લેવાની પ્રક્રિયા પૂર્ણ કરવામાં આવી હતી.

અભિષેક બેનર્જી લગભગ દોઢ કલાક સુધી કોર્ટ રૂમમાં રહ્યા હતા અને વૉઇસ સેમ્પલિંગની વિધિ પતાવીને કોઈ પણ પત્રકારના પ્રશ્નોનો જવાબ આપ્યા વિના સીધા જ રવાના થઈ ગયા હતા. નોંધનીય છે કે, કોલકાતા હાઇકોર્ટે ૧૦ જુલાઈના રોજ તેમના પર તપાસમાં સહકાર ન આપવા બદલ સખત નારાજગી વ્યક્ત કરી હતી અને ૧૫ જુલાઈના રોજ બપોરે મેજિસ્ટ્રેટ સમક્ષ હાજર થવાનો કડક આદેશ આપ્યો હતો. અગાઉ બે વખત બિધાનનગર કોર્ટના આદેશ છતાં ટીએમસી સાંસદ ગેરહાજર રહ્યા હતા, પરંતુ હાઇકોર્ટના તેવર જોયા બાદ આ વખતે તેમણે હાજર થવું પડ્યું હતું.

કોર્ટમાં હાજરી દરમિયાન સુરક્ષા વ્યવસ્થા અત્યંત કડક રાખવામાં આવી હતી. અગાઉ ૩૦ મેના રોજ જ્યારે તેઓ સોનારપુર વિસ્તારની મુલાકાતે ગયા હતા, ત્યારે તેમની સાથે છેડછાડ થઈ હતી. આ બાબતને ધ્યાનમાં રાખીને તેમના વકીલે અગાઉથી જ સુરક્ષાની માગ કરી હતી, જેના આધારે હાઈકોર્ટે પોલીસ પ્રશાસનને સખત નિર્દેશ આપ્યા હતા કે ડાયમંડ હાર્બરના સાંસદ જ્યારે કોર્ટ કે તપાસ એજન્સી સમક્ષ જાય ત્યારે કોઈ તેમના પર ઇંડા કે શાહી ન ફેંકે અથવા અન્ય કોઈ હેરાનગતિ ન થાય તે સુનિશ્ચિત કરવું. આથી સોલ્ટ લેક સ્થિત કોર્ટ પરિસરમાં પોલીસનો મોટો કાફલો તૈનાત રહ્યો હતો.

આ સમગ્ર મામલો ૨૯ એપ્રિલના રોજ યોજાયેલી પશ્ચિમ બંગાળ વિધાનસભા ચૂંટણીના બીજા તબક્કાના પ્રચાર વખતનો છે, જ્યાં એક જાહેર સભામાં અભિષેક બેનર્જીએ વિરોધી પક્ષના નેતાઓ અને કાર્યકરો સામે કથિત ધમકીભર્યા ઉચ્ચારણો કર્યા હતા. આ મામલે તેમની સામે એફઆઈઆર (FIR) નોંધાઈ હતી, જેને રદ કરાવવા તેમણે હાઇકોર્ટમાં ધા નાખી છે. ન્યાયાધીશ સૌગત ભટ્ટાચાર્યએ સ્પષ્ટ કર્યું છે કે બેનર્જીને ૩૧ જુલાઈ સુધી ધરપકડ કે કોઈ પણ બળજબરીથી કાર્યવાહી સામે જે રક્ષણ મળ્યું છે, તે તપાસમાં તેમના સહયોગ પર જ આધારિત રહેશે. હવે આ વૉઇસ સેમ્પલના ફોરેન્સિક રિપોર્ટ બાદ આ કેસ નવો વળાંક લે તેવી પૂરી શક્યતા છે.