રાયપુર, તા.૦૭: આજના આધુનિક યુગમાં સોશિયલ મીડિયા અને ટૂંકા વીડિયો (રીલ્સ) જોવાની લત કેટલી ઘાતક સાબિત થઈ શકે છે, તેનો એક અત્યંત હૃદયદ્રાવક અને ચોંકાવનારો કિસ્સો છત્તીસગઢના કોરબા જિલ્લાના કરતલા સ્થિત કેરાકાચર ગામમાંથી સામે આવ્યો છે. અહીં એક ૫૨ વર્ષીય પરણિત મહિલા મંગલો બાઈ સારથીએ મોબાઈલમાં ઈન્ટરનેટ નેટવર્ક બંધ થઈ જતાં અને વીડિયો અટકી જતાં આવેશમાં આવીને પોતાનો જ જીવ ટૂંકાવી લીધો છે. ડિજિટલ વ્યસનના કારણે ઘટેલી આ કરુણ ઘટનાથી સમગ્ર વિસ્તારમાં ભારે શોક અને અરેરાટી વ્યાપી ગઈ છે.

મળતી વિગતો મુજબ, મૃતક મહિલા પોતાના ઘરે મોબાઈલ પર સતત વીડિયો જોઈ રહી હતી. આ દરમિયાન વારંવાર નેટવર્ક કનેક્ટિવિટી ખોરવાતાં વીડિયો અટકી અટકીને ચાલવા લાગ્યો હતો. ઈન્ટરનેટના સ્પીડ પ્રોબ્લેમથી મહિલા એટલી હદે ક્રોધિત થઈ ગઈ કે તેણે પ્રથમ પોતાનો કિંમતી મોબાઈલ જમીન પર પછાડીને તોડી નાખ્યો હતો. ફોન તૂટી ગયા પછી પણ તેનો ગુસ્સો શાંત થયો નહોતો અને તેણે આવેગમાં આવીને ઘરમાં રાખેલી જંતુનાશક દવા ગટગટાવી લીધી હતી. ૧૭ વર્ષની પુત્રીએ માતાની તબિયત લથડતી જોઈ પરિવારને જાણ કરી હતી, પરંતુ હોસ્પિટલમાં સારવાર દરમિયાન તેમનું મોત નિપજ્યું હતું.

મનોચિકિત્સકોના મતે, આ ઘટના સોશિયલ મીડિયા અને સ્માર્ટફોનના વધતા ભયાનક અતિરેક તરફ ઈશારો કરે છે. આજના સમયમાં રીલ્સ અને શોર્ટ વીડિયો જોવાની સામાન્ય લાગતી ટેવ ધીમે ધીમે એક ગંભીર મનોવૈજ્ઞાનિક પરાધીનતા (ડિજિટલ એડિક્શન)માં ફેરવાઈ રહી છે. જ્યારે ઈન્ટરનેટ કે મોબાઈલથી વ્યક્તિ દૂર થાય છે ત્યારે તેનામાં ભારે ચિંતા, ગુસ્સો અને ડિપ્રેશન જેવા લક્ષણો જોવા મળે છે. આવી સ્થિતિથી બચવા માટે પરિવારે સ્ક્રીન ટાઈમની મર્યાદા નક્કી કરવી અને ડિજિટલ ડિટોક્સ અપનાવવું અત્યંત જરૂરી બન્યું છે.

ડિજિટલ દુનિયાના આ અદ્રશ્ય વ્યસનથી બાળકો અને વડીલોને દૂર રાખવા માટે આપણે દૈનિક જીવનમાં વ્યાવહારિક પગલાં ભરવા જોઈએ.