IPOમાં રાજકોટના ડંકા : હબ તરીકે ઉપસ્યું : વધુ ૪ કંપની લાઇનમાં
૨૦૨૫માં ૧૦૦થી વધુ IPO મૂડીબજારમાં આવ્યા : જેમાં રાજકોટની કંપનીઓનો પણ મજબુત ફાળો ૨૦૨૬માં ઓમ્નીટેક, વરમોરા ગ્રેનિટો, અર્જુન જવેલર્સ, સિલ્વર કન્ઝયુમર્સ વગેરે કંપનીઓ મુડીબજારમાં આવવા સજ્જ
રાજકોટ, તા.૧: માત્ર ગુજરાત જ નહીં પરંતુ સમગ્ર ભારત માટે મૂડી બજારનું મહત્વનું કેન્દ્ર ગણાતું રાજકોટ ૨૦૨૬માં નવા અનેક આઈપીઓ જોવા માટે તત્પર છે. શહેરની ચાર કંપનીઓએ મૂડી બજારમાં પ્રવેશવાની તૈયારીઓ શરૂ કરી દીધી છે. પ્રિસિઝન એન્જિનિયરિંગ કંપની ઓમ્નિટેક એન્જિનિયરિંગ લિમિટેડ, કન્ઝ્યુમર ડ્યુરેબલ્સ ઉત્પાદક સિલ્વર કન્ઝ્યુમર ઇલેક્ટ્રિકલ્સ લિમિટેડ અને ટાઇલ્સ તથા બાથવેર ઉત્પાદક વર્મોરા ગ્રેનિટો લિમિટેડને તેમના આઈપીઓ માટે સિકયોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) તરફથી મંજૂરી મળી ગઈ છે. દરમિયાન, રિટેલ જ્વેલરી કંપની અર્જુન જ્વેલર્સ લિમિટેડે ડ્રાફ્ટ રેડ હેરિંગ પ્રોસ્પેક્ટસ (ડીઆરએચપી) ફાઇલ કર્યું છે અને નિયમનકારી મંજૂરીની રાહ જોઈ રહી છે.
સપ્ટેમ્બર ૨૦૨૫માં ઓમ્નિટેક એન્જિનિયરિંગે તેના રૂ. ૮૫૦ કરોડના આઈપીઓ માટે સેબીની મંજૂરી મેળવી હતી. કંપની હાઇ પ્રિસિઝન એન્જિનિયર્ડ કમ્પોનેન્ટ્સ અને એસેમ્બલીઓના મુખ્ય ઉત્પાદકોમાંની એક છે જે એનર્જી, મોશન કંટ્રોલ અને ઓટોમેશન, ઇન્ડસ્ટ્રીયલ ઇક્વિપમેન્ટ સિસ્ટમ્સ, મેટલ ર્ફોમિંગ અને અન્ય વૈવિધ્યસભર ઇન્ડસ્ટ્રીયલ એપ્લિકેશન્સ જેવા ઉદ્યોગોમાં વૈશ્વિક ગ્રાહકોને સપ્લાય કરે છે.
નવેમ્બર ૨૦૨૫માં રાજકોટ સ્થિત બીજી કંપની, સિલ્વર કન્ઝ્યુમર ઇલેક્ટ્રિકલ્સને રૂ. ૧,૪૦૦ કરોડના પબ્લિક ઇશ્યૂ માટે સેબીની મંજૂરી મળી હતી. કંપની સિલ્વર અને બેડિયા બ્રાન્ડ હેઠળ ઇલેક્ટ્રિકલ કન્ઝ્યુમર ડ્યુરેબલ્સ અને કળષિ ઉપકરણોનું ઉત્પાદન કરે છે. તેના પ્રોડક્ટ પોર્ટફોલિયોમાં પંપ, મોટર્સ, સોલાર પંપ અને કંટ્રોલર્સ, પંખા અને લાઇટિંગ પ્રોડક્ટ્સનો સમાવેશ થાય છે. આ બધી પ્રોડક્ટ્સનું રાજકોટમાં તેની ઇન્ટિગ્રેટેડ ફેસિલિટીમાં ઉત્પાદન થાય છે.
આ અઠવાડિયે, વર્મોરા ગ્રેનિટો લિમિટેડને તેના આઈપીઓ માટે સેબીની મંજૂરી મળી છે જેમાં રૂ. ૪૦૦ કરોડ સુધીના ફ્રેશ ઇશ્યૂ અને ૫.૨૪ કરોડ સુધીના ઇક્વિટી શેરની વેચાણ માટેની ઓફરનો સમાવેશ થાય છે. વર્મોરા ગ્રેનિટો ગ્લેઝ્ડ વિટ્રિફાઇડ, પોલિશ્ડ વિટ્રિફાઇડ અને સિરામિક ટાઇલ્સ જેવી વિવિધ કેટેગરીઝમાં સિરામિક અને વિટ્રિફાઇડ ટાઇલ્સનું ઉત્પાદન અને માર્કેટિંગ કરે છે. કંપની પાસે ૨૮૬ એક્સક્લુઝિવ બ્રાન્ડ આઉટલેટ્સ, ૨,૦૦૦થી વધુ મલ્ટીપ્રબ્રાન્ડ આઉટલેટ્સનું ડિસ્ટ્રીબ્યુશન નેટવર્ક અને બિલ્ડર્સ, ડેવલપર્સ, કોન્ટ્રાક્ટર્સ અને સરકારી પ્રોજેક્ટ્સને સેવાઓ આપતું વિશાળ બીટુબી નેટવર્ક છે.
આ પાઇપલાઇનમાં રાજકોટ સ્થિત મુખ્ય મથક ધરાવતી રિટેલ જ્વેલરી કંપની અર્જુન જ્વેલર્સ લિમિટેડ જોડાઈ રહી છે, જેણે સપ્ટેમ્બર ૨૦૨૫માં સેબીમાં તેનું ડીઆરએચપી ફાઇલ કર્યું હતું. કંપની આઈપીઓ દ્વારા રૂ.૧૮૦ કરોડ એકત્ર કરવાની યોજના ધરાવે છે. અર્જુન જ્વેલર્સ એક રિટેલ-કેન્દ્રિત જ્વેલરી કંપની છે જે તેના પોતાના રિટેલ સ્ટોર્સની ચેઇન દ્વારા સોના, ચાંદી, પ્લેટિનમ, હીરા અને અન્ય કિંમતી રત્નોનો ઉપયોગ કરીને બનાવેલી વિશાળ શ્રેણીની જ્વેલરીના માર્કેટિંગ અને વેચાણના વ્યવસાય સાથે સંકળાયેલી છે.
કોવિડ પછી રાજકોટમાં ગોપાલ તોક્સ, જ્યોતિ સીએનસી ઓટોમેશન, એનલોન હેલ્થકેર અને રોલેક્સ રિંગ્સ જેવા નોંધપાત્ર લિસ્ટિંગ જોવા મળ્યા છે જે શહેરની મૂડી બજારોમાં વધી રહેલી હાજરી દર્શાવે છે.
આઈપીઓની આ ગતિ મજબૂત પ્રાયમરી માર્કેટ સાયકલના પરિપ્રેક્ષ્યમાં પણ જોવાઈ છે. કેલેન્ડર વર્ષ ૨૦૨૫ ભારતના મૂડી બજારો માટે એક વિક્રમજનક વર્ષ હતું, જેમાં ૧૦૦થી વધુ મેઇનબોર્ડ આઈપીઓ હતા, જે રોકાણકારોની સતત ઇચ્છા અને ઇશ્યૂ માટેના સાનુકૂળ વાતાવરણને દર્શાવે છે.
બજારના સહભાગીઓ કહે છે કે આગામી લિસ્ટિંગ ગુજરાતની આઈપીઓ પાઇપલાઇનમાં, ખાસ કરીને ઉત્પાદન, કન્ઝ્યુમર ડ્યુરેબલ્સ અને રિટેલના ક્ષેત્રે રાજકોટના વધી રહેલા યોગદાનને દર્શાવે છે. ઘણી કંપનીઓ મૂડી બજારમાં પ્રવેશવાની તૈયારી કરી રહી છે ત્યારે શહેર વધુને વધુ આઈપીઓ માટે તૈયાર વ્યવસાયોના હબ તરીકે ઉભરી રહ્યું છે
(3:33 PM IST)
