રાજકોટ મહાનગરપાલિકા દ્વારા શહેરના મધ્યમ અને ગરીબ વર્ગના પરિવારો માટે રાહતના સમાચાર આપવામાં આવ્યા છે. અત્યાર સુધી મ્યુનિસિપલ કોમ્યુનિટી હોલના બુકિંગ માટે જે સમય મર્યાદા હતી તેમાં વધારો કરવામાં આવ્યો છે. હવે નાગરિકો કોઈપણ સામાજિક પ્રસંગ કે લગ્ન માટે ૬ મહિના અગાઉથી હોલનું બુકિંગ કરાવી શકશે. અગાઉ આ સમયમર્યાદા ઓછી હોવાને કારણે છેલ્લી ઘડીએ હોલ ન મળતા લોકોને ખાનગી વાડીઓ કે હોલના મોંઘા ભાડા ચૂકવવા પડતા હતા.

મ્યુનિસિપલ કમિશનરે આ અંગે માહિતી આપતા જણાવ્યું હતું કે, ખાસ કરીને લગ્નગાળામાં હોલની માંગ ખૂબ વધી જતી હોય છે. ઘણા પરિવારો પોતાના આયોજન અગાઉથી કરી રાખતા હોય છે પરંતુ મનપાના નિયમો મુજબ બુકિંગ મોડું ખુલતું હોવાથી તેમને મુશ્કેલી પડતી હતી. આ નવી વ્યવસ્થાથી પારદર્શિતા આવશે અને ભ્રષ્ટાચારની ફરિયાદોમાં પણ ઘટાડો થશે. જે નાગરિકો ઓનલાઈન બુકિંગ કરવા માંગતા હોય તેમના માટે પોર્ટલમાં જરૂરી સુધારા કરી દેવામાં આવ્યા છે.

આ ઉપરાંત, હોલની સુવિધાઓમાં પણ વધારો કરવામાં આવી રહ્યો છે. સીસીટીવી કેમેરા, પાર્કિંગની સુવિધા અને સાફ-સફાઈ માટે વિશેષ સૂચનાઓ આપવામાં આવી છે. રાજકોટમાં આવેલા વિવિધ વોર્ડના કોમ્યુનિટી હોલ હવે વધુ લોકભોગ્ય બનશે. વિરોધ પક્ષ અને શાસક પક્ષ બંનેએ આ નિર્ણયને આવકાર્યો છે અને જણાવ્યું છે કે આનાથી સામાન્ય માણસના ખિસ્સા પરનો બોજ ઓછો થશે.