રાજકોટ ડિવિઝનના એક કર્મચારીની સતર્કતા અને ત્વરિત કાર્યવાહીથી સંભવિત રેલ દુર્ઘટના ટળી ગઈ. આ પ્રશંસનીય કાર્ય માટે પશ્ચિમ રેલવેના મહાપ્રબંધક (પ્રભારી) પ્રદીપ કુમારે મુંબઈ સ્થિત પશ્ચિમ રેલવે મુખ્યાલય ખાતે આયોજિત સમારોહમાં જગદીશ પ્રસાદ બૈરવા, વરિષ્ઠ પેસેન્જર ટ્રેન મેનેજર (મુખ્યાલય, રાજકોટ) ને “મેન ઓફ ધ મંથ” (જાન્યુઆરી-2026) સુરક્ષા પુરસ્કારથી સન્માનિત કર્યા.
    તારીખ 15 જાન્યુઆરી 2026 ના રોજ જગદીશ પ્રસાદ બૈરવા ટ્રેન સંખ્યા 22969 ઓખા-બનારસ એક્સપ્રેસમાં ફરજ પર હતા. ભાટેલ અને ખંભાળિયા સ્ટેશનો વચ્ચે કિલોમીટર સંખ્યા 895/07 અને 895/05 ની વચ્ચે તેમને ટ્રેનમાં અસામાન્ય ઝટકો અનુભવાયો હતો. પરિસ્થિતિની ગંભીરતાને સમજીને તેમણે તત્પરતા દાખવી સંબંધિત સ્થળને ચિહ્નિત કર્યું અને તરત જ સંબંધિત અધિકારીઓને જાણ કરી. લોકો પાઈલટનો સંપર્ક કરી અસામાન્ય ઝટકાની પુષ્ટિ કર્યા બાદ તેમણે ખંભાળિયા સ્ટેશનના સ્ટેશન માસ્ટરને લેખિત જાણ પણ કરી હતી, જેના કારણે તાત્કાલિક જરૂરી કાર્યવાહી સુનિશ્ચિત થઈ શકી.
જાણ મળતાની સાથે જ સ્ટેશન માસ્ટર, ખંભાળિયા દ્વારા ઓપરેટિંગ અને એન્જિનિયરિંગ વિભાગના સંબંધિત કર્મચારીઓને વાકેફ કરવામાં આવ્યા હતા. એન્જિનિયરિંગ વિભાગની ટીમ દ્વારા સ્થળ નિરીક્ષણ કરવામાં આવતા સંબંધિત સ્થળ પર રેલ વેલ્ડ ફ્રેક્ચર જોવા મળ્યું હતું, જે ગંભીર અકસ્માતનું કારણ બની શકતું હતું. સુરક્ષાને સર્વોચ્ચ અગ્રતા આપીને તે સેક્શન પર તાત્કાલિક 20 કિમી પ્રતિ કલાકનો સાવચેતી આદેશ લાગુ કરવામાં આવ્યો હતો અને જરૂરી સમારકામ બાદ રેલ સંચાલન પૂર્ણ સુરક્ષા સાથે ફરી શરૂ કરવામાં આવ્યું હતું.
 બૈરવાની સતર્કતા, જવાબદારી અને નિષ્ઠાને કારણે એક સંભવિત ગંભીર અકસ્માત ટળી ગયો, જેનાથી મુસાફરોની સુરક્ષા સુનિશ્ચિત થઈ અને રેલવે મિલકત તેમજ રેલ સંચાલનને સંભવિત નુકસાનથી બચાવી શકાયું.
રાજકોટ ડિવિઝન રેલ પ્રબંધક ગિરિરાજ કુમાર મીનાએ જગદીશ પ્રસાદ બૈરવાને પુરસ્કાર પ્રાપ્ત કરવા બદલ અભિનંદન પાઠવતા જણાવ્યું હતું કે, “બૈરવા દ્વારા પ્રદર્શિત સતર્કતા, જવાબદારી અને નિષ્ઠા રેલવે કર્મચારીઓ માટે એક પ્રેરણાદાયક ઉદાહરણ છે. તેમની સજાગતાથી સંભવિત અકસ્માત ટળવો તે દર્શાવે છે કે સુરક્ષા પ્રત્યેની પ્રતિબદ્ધતા જ સુરક્ષિત રેલ સંચાલનનો પાયો છે. આવા સમર્પિત પ્રયાસો ભારતીય રેલવેની સુરક્ષા સંસ્કૃતિને વધુ મજબૂત બનાવે છે.”