રાજકોટ, તા.૨૦: દર વર્ષે ૨૦ માર્ચે વર્લ્‍ડ હેપીનેસ ડે ઉજવવામાં આવે છે, જે માનવ જીવનમાં સુખ, માનસિક સ્‍વાસ્‍થ્‍ય અને સામાજિક સુખાકારીનું મહત્‍વ સમજાવે છે. વર્ષ ૨૦૧૨માં સ્‍થાપિત અને ૨૦૧૩થી ઉજવણી શરૂ થયેલો આ દિવસ લોકોમાં હકારાત્‍મકતા અને સંતુલિત જીવન તરફ પ્રેરણા આપે છે. આ અવસર પર સૌરાષ્‍ટ્ર યુનિવર્સિટીના મનોવિજ્ઞાન ભવન દ્વારા ૨૨૫૦ લોકો પર કરવામાં આવેલા સર્વેમાં અનેક મહત્‍વપૂર્ણ તારણો સામે આવ્‍યા છે.

આ સર્વે મુજબ આજના સમયમાં લોકો બહારથી ખુશ દેખાય છે, પરંતુ અંદરથી એકલતા અનુભવતા થયા છે. ૫૬.૨% લોકો તેમના વર્તમાન જીવનથી સંતોષ અનુભવે છે, જ્‍યારે ૩૮.૨% લોકો ખૂબ જ અસંતોષ અનુભવે છે. દૈનિક જીવનમાં ઉત્‍સાહ પણ એક મોટો મુદ્દો બન્‍યો છે. માત્ર ૩૯.૪૦% લોકો હંમેશા ઉત્‍સાહ અનુભવે છે, જ્‍યારે ૫૪.૬૦% લોકો કયારેક જ ઉત્‍સાહ અનુભવતા હોય છે.

મુશ્‍કેલીઓ પ્રત્‍યેનો અભિગમ પણ માનસિક સ્‍થિતિ બતાવે છે. ૬૫.૫૦% લોકો મુશ્‍કેલીઓને નસીબનો ખેલ માને છે, જ્‍યારે માત્ર ૨૭.૩૦% લોકો તેને નવી તક તરીકે જુએ છે. આ સર્વેનું સૌથી ચોંકાવનારું તારણ એ છે કે ૫૮.૨૦% લોકો પાસે મનની વાત કરવા માટે કોઈ નથી, જે આજના સમયમાં વધતી સામાજિક એકલતા દર્શાવે છે.

માનસિક સ્‍વાસ્‍થ્‍ય માટે ઊંઘ અને જીવનશૈલી પણ જવાબદાર છે. ૬૧.૪% લોકો માત્ર ૫-૬ કલાક ઊંઘ લે છે, જ્‍યારે માત્ર ૩૩.૭૦% લોકો ૭-૮ કલાક પૂરતી ઊંઘ લે છે. ગુસ્‍સો અને તણાવ પણ જીવનનો ભાગ બની ગયા છે. ૫૭.૮૦% લોકોને નાની નાની બાબતોમાં ગુસ્‍સો આવી જાય છે, જ્‍યારે ૬૮.૫% લોકોએ છેલ્લા અઠવાડિયામાં તણાવ અનુભવ્‍યો છે.

સામાજિક અને પરિવાર સાથેનો સમય પણ ઓછો થયો છે. માત્ર ૨૧.૭% લોકો દરરોજ પરિવાર સાથે સમય વિતાવે છે, જ્‍યારે ઘણા લોકો ભાગ્‍યે જ પરિવાર સાથે સમય પસાર કરે છે. આ છતાં સકારાત્‍મક બાબત એ છે કે ૯૩.૭૦% લોકો બીજાને મદદ કરીને સારું અનુભવે છે અને ૭૪.૭૦% લોકો દરરોજ ઈશ્વર અથવા કુદરતનો આભાર માને છે, જે જીવનમાં હકારાત્‍મકતા જાળવી રાખે છે.

વિશેષજ્ઞોના જણાવ્‍યા મુજબ સુખ માટે મજબૂત સંબંધો, સંવાદ અને આત્‍મસ્‍વીકાર ખૂબ જ જરૂરી છે. પોતાની ભૂલોને સ્‍વીકારીને આગળ વધવું, પરિવાર સાથે સમય વિતાવવો, પૂરતી ઊંઘ લેવી અને રોજિંદા જીવનમાં કળતજ્ઞતા દાખવવી - આ બધું સાચા સુખ તરફ લઈ જાય છે. આ રીતે, વર્લ્‍ડ હેપીનેસ ડે આપણને યાદ અપાવે છે કે સાચું સુખ બહાર નહીં પરંતુ આપણા સંબંધો, વિચારો અને મનની શાંતિમાં રહેલું છે