રાજકોટઃ શહેરના કૃષ્‍ણનગર મેઇન રોડ ગુરૂપ્રસાદ ચોકમાં ગઇકાલે આવેલા વાવાઝોડાને કારણે વિજલાઇનમાં ફોલ્‍ટ ઉભો થયો હોઇ થાંભલો પડી ગયો હોઇ આજે સવારે પીજીવીસીએલના સ્‍ટાફ રીપેરીંગ કામ કરતો હતો તે વખતે ગુજરાત ગેસની લાઇન લિકેજ થઇ જતાં દોડધામ મચી ગઇ હતી. આ વખતે જ ત્‍યાંથી એક નાગરિક દશરથભાઇ બારોટ નોકરી પર જવા માટે પસાર થતાં હોઇ તેણે મવડી ફાયર બ્રિગેડ ખાતે રૂબરૂ જઇ જાણ કરતાં ફાયર બ્રિગેડના અધિકારી મઠીયા, નરેશભાઇ, શક્‍તિસિંહ, ગોૈતમભાઇ, ધ્રુવીલસિંહ, અશોકભાઇ સહિતનો સ્‍ટાફ ફાયર ફાઇટર સાથે પહોંચ્‍યો હતો. ગેસની લાઇન તૂટી હોઇ અહિ ગુજરાત ગેસનો સ્‍ટાફ પણ પહોંચી ગયો હતો. આ ટીમે લિકેજ બંધ કર્યુ હતું. કોઇ જાનહાની થઇ નહોતી. જો કે આસપાસના વિસ્‍તારોમાં ગેસ વિતરણ ઠપ્‍પ થઇ જતાં ગૃહિણીઓમાં દેકારો મચી ગયો હતો. તસ્‍વીરમાં ઘટનાના દ્રશ્‍યો જોઇ શકાય છે (તસ્‍વીરઃ અભિજીત બગથરીયા)