રાજકોટ: રાજકોટ શહેરના રેસકોર્ષ મેદાન ખાતે લોકમેળા સમિતિ દ્વારા આગામી તા. ૦૨ ઓગસ્ટ, ૨૦૨૬ થી તા. ૦૬ ઓગસ્ટ, ૨૦૨૬ દરમિયાન ભવ્ય લોકમેળાનું આયોજન કરવામાં આવ્યું છે. આ લોકમેળા-૨૦૨૬ માં વિવિધ કેટેગરીના સ્ટોલ તથા પ્લોટ મેળવવા ઈચ્છુક નાગરિકો માટે ફોર્મ વિતરણ અને સ્વીકારવાની કામગીરી સંદર્ભે અધ્યક્ષ, લોકમેળા અમલીકરણ સમિતિ અને નાયબ કલેક્ટર (રાજકોટ શહેર-૧ પ્રાંત) દ્વારા એક મહત્વની અખબારી યાદી જાહેર કરવામાં આવી છે.

અખબારી યાદીમાં જણાવ્યા અનુસાર, લોકમેળામાં વધુમાં વધુ લોકો લાભ લઈ શકે અને લોકસહભાગીતામાં વધારો થાય તેવા આશયથી ફોર્મ વિતરણ તેમજ ભરાયેલા ફોર્મ પરત મેળવવાની મુદતમાં વધારો કરવાનો નિર્ણય લેવાયો છે. પૂર્વ નિર્ધારિત સમયપત્રક મુજબ તા. ૨૦ જુલાઈ, ૨૦૨૬ થી તા. ૨૮ જુલાઈ, ૨૦૨૬ સુધી સવારે ૧૧:૦૦ થી સાંજે ૪:૦૦ કલાક દરમિયાન ફોર્મ વિતરણ અને સ્વીકારવાનું આયોજન કરાયું હતું. પરંતુ હવે મુદત વધારીને તા. ૨૯ જુલાઈ, ૨૦૨૬ થી તા. ૩૧ જુલાઈ, ૨૦૨૬ સુધી ફોર્મનું વિતરણ તેમજ ભરાયેલા ફોર્મ પરત સ્વીકારવામાં આવશે. ફોર્મ વિતરણ અને સ્વીકારવાની આ તમામ કામગીરી ઈન્ડિયન બેન્ક, તોરલ બિલ્ડીંગ, રાજકોટ ખાતેથી કરવામાં આવશે. તંત્ર દ્વારા સ્પષ્ટતા કરવામાં આવી છે કે આ લંબાવવામાં આવેલી સમય મર્યાદા પૂર્ણ થયા બાદ કોઈપણ સંજોગોમાં મુદત વધારો કરવામાં આવશે નહીં.

આ ઉપરાંત, વિવિધ સ્ટોલ અને પ્લોટની ફાળવણી માટેના ડ્રોની તારીખમાં પણ આંશિક ફેરફાર કરવામાં આવ્યો છે. કેટેગરી B, C, J અને K ના પ્લોટ/સ્ટોલ માટેનો ડ્રો અગાઉ તા. ૦૧ ઓગસ્ટ, ૨૦૨૬ (શનિવાર) ના રોજ યોજાવાનો હતો, જેને બદલે હવે તા. ૦૩ ઓગસ્ટ, ૨૦૨૬ (સોમવાર) ના રોજ રાખવામાં આવ્યો છે. તંત્ર દ્વારા વધુમાં જણાવવામાં આવ્યું છે કે હરાજીની તારીખોમાં કોઈ જ ફેરફાર કરવામાં આવ્યો નથી અને તે પૂર્વવત રહેશે. આ તમામ બાબતોની સંબંધકર્તા તમામ અસપિરેન્ટ્સ અને વેપારીઓએ નોંધ લેવા અનુરોધ કરવામાં આવ્યો છે.