ભુજ,તા.૬,

હાલ નવરાત્રિ ચાલી રહી છે, ત્યારે માતાજીના મંદિરોમાં દર્શન કરવા માટે દર્શનાર્થીઓ ઉમટતા હોય છે. પશ્વિમ કચ્છના છેવાડે આવેલા લખપત તાલુકાના પ્રસિદ્ધ યાત્રાધામ માતાના મઢ ખાતે આ વખતે સારા ચોમાસા બાદ અભૂતપૂર્વ પ્રમાણમાં યાત્રિકોનો પ્રવાહ માતાના મઢ મંદિરે દર્શનાર્થે પહોંચ્યો હતો. ખાસ કરીને પદયાત્રા અને સાયકલ યાત્રા કરીને પહોંચેલા યાત્રિકોની સંખ્યા વિશેષ રહી હતી.

આજે માતાના મઢ પહોંચેલા યાત્રિકોને હવે ઘરે પરત ફરવા માટે વાહનો મેળવવા ખૂબ મુશ્કેલી પડી હતી. જોકે પ્રવાસીઓના ઘસારાને પહોંચી વળવા કચ્છ એસટી વિભાગે ૧૫૦ જેટલી બસો દોડાવવી પડી હતી.સ્થાનિક સૂત્રોના જણાવ્યા પ્રમાણે, પ્રથમ નોરતા સુધીમાં મોટા ભાગનો પદયાત્રીઓનો પ્રવાહ માતાના મઢ પહોંચી આવતો હોય છે. એક સાથે હજારોની સંખ્યામાં નિયત સ્થળે પહોંચવા લોકો અધીરા બનતા ભીડ જામે છે. પરિવહન કરતા વાહનો પણ યાત્રિકોને લિફ્ટ આપતા હોય છે અને એસટી બસો પણ દોડી રહી છે.

જોકે લોકોના ભારે ઘસારાને પગલે એસટી બસ હકડેઠઠ મુસાફરોથી ભરાઈ જતી હોવાથી બસમાં જગ્યા મેળવવા લોકો પડાપડી કરતા હતા.  કચ્છ જિલ્લાની મુલાકાતે આવેલા ગુજરાત રાજ્યના મુખ્યમંત્રી ભૂપેન્દ્રભાઈ પટેલ નવલા નોરતામાં માતાના મઢ ખાતે દેશદેવી મા આશાપુરાના દર્શનાર્થે આવ્યા હતા. કચ્છની કુળદેવીના મંદિરમાં મુખ્યમંત્રીએ માતાજીના શરણે શિશ નમાવી વિશ્વ શાંતિ સાથે જન સુખાકારીની કામના કરી હતી. મંદિર ખાતે મુખ્યમંત્રીએ રાજાબાવા યોગેન્દ્રસિંહની શુભેચ્છા મુલાકાત કરી હતી.

 માતાના મઢ જાગીર ટ્રસ્ટ વતી ખેંગારજી જાડેજા, પ્રવિણસિંહ વાઢેર, કનૈયાલાલભાઈ કટારિયા, પ્રતાપભાઈ આશર, મયુરસિંહ જાડેજા, ગજુભા ચૌહાણ, સિધ્ધરાજસિંહ ચૌહાણ, અશોકસિંહ જાડેજા, સુરેન્દ્રસિંહ જાડેજા, મૂળશંકર વાસુ સહિતનાએ મુખ્યમંત્રીનું સ્વાગત કરી કચ્છની માતાના મઢની પાવન ભૂમિ પર આવકાર્યા હતા.મુખ્યમંત્રી માતાના મઢ હેલિપેડ ખાતે પહોંચ્યા  ત્યારે સાંસદ વિનોદ ચાવડા, અબડાસાના ધારાસભ્ય પ્રદ્યુમ્નસિંહ જાડેજા વગેરેએ સ્વાગત કર્યુ હતુ.