મોરબી ફાયનાન્સની ઓફીસમાંથી સાત લાખની ચોરી કરનાર બે કર્મચારી સહિત ચાર પકડાયા
સાત લાખની રોકડ સહિત આઠ લાખનો મુદામાલ કબ્જેઃ મોરબી એલસીબીએ ભેદ ઉકેલ્યો
તસ્વીરમાં પકડાયેલ શખ્સો (નીચે બેઠેલા) સાથે મોરબી એલસીબીનો કાફલો નજરે પડે છે. (તસ્વીરઃ પ્રવિણ વ્યાસ-મોરબી) (૪.૨૮)
(પ્રવિણ વ્યાસ દ્વારા) મોરબી, તા., ૨૧: શહેરમાં આવેલ માઈક્રો ફાયનાન્સ કંપનીની ઓફીસના શટરના તાળા ખોલી ઓફિસમાં રહેલ તિજોરીમાંથી ૭ લાખથી વધુની રોકડ રકમ ચોરી કરી ગયાની પોલીસ ફરિયાદ નોધાયા બાદ એલસીબી ટીમે તપાસ દરમિયાન બે કર્મચારી સહિત ચાર ઇસમોને રોકડ સહિતના મુદામાલ સાથે ઝડપી લીધા હતા.
નાની વાવડીના રહેવાસી જીતેન્દ્રસિંહ રાજેન્દ્રસિંહ જાડેજા (ઉ.વ.૩૬) વાળાએ અજાણ્યા ઇસમ વિરુદ્ધ ફરિયાદ નોંધાવી છે જેમાં જણાવ્યું છે કે તેઓ સત્યમ પાન વાળી શેરીમાં આવેલ લાઈટ માઈક્રો ફાયનાન્સ પ્રા. લી. કંપનીમાં બ્રાંચ મેનેજર તરીકે ફરજ બજાવે છે. ઓફિસની તમામ ચાવીઓ જીતેન્દ્રસિંહ પાસે હોય છે ગત તા. ૧૫-૧૧ ના રોજ આગલા દિવસના તેમજ તા. ૧૫ ના કલેક્શન થયેલ રૂપિયા મળીને રોકડ રૂ ૭,૦૧,૫૦૦ ગણતરી કરીને ઓફિસની તિજોરીમાં મુકયા હતા. બાદમાં તા. ૧૬-૧૧ ના રોજ સવારના ઓફિસે આવતા શટરનો દરવાજો ખોલવા જતા તાળું ખુલ્લું હતું અને શટર ખોલીને અંદર તિજોરી પાસે જોતા તિજોરી લોક જોવામાં આવ્યો નહિ અને સ્ટાફના મિત્રોને ફોન કરતા થોડીવારમાં બધા આવી ગયા હતા બ્રાંચ ઓપરેશન ઓફિસર જયભાઈ સોલંકીને ફોન કરી બોલાવ્યા હતા તેઓ પોણા નવેક વાગ્યે આવ્યા હતા અને તિજોરીમાં આગલી સાંજે મુકેલા રોકડા રૂ ૭,૦૧,૫૦૦ જોવા મળ્યા ના હતા ઓફીસના સીસીટીવી કેમેરા ચેક કરતા તા. ૧૫ ના રોજ રાત્રીના ૧૦.૩૦ કલાકે એક વ્યક્તિ મોઢે રૂમાલ બાંધી માથે ટોપી પહેરી ઓફિસમાં પ્રવેશ કરી રોકડ લઇ જતો જોવા મળ્યો હતો મોરબી સીટી એ ડીવીઝન પોલીસે ફરિયાદ નોંધી તપાસ ચલાવી છે.
દરમિયાન એલસીબી ટીમ સીસીટીવી ચેક કરતા એક મોટર સાઈકલ ડબલ સવારી શંકાસ્પદ લાગતા નવલખી રોડ પર રેલ્વે રેલ્વે સ્ટેશન પાસે મોટર સિકલ નીકળતા ચેક કરતા રોકડ રૂપિયા, મોબાઈલ અને ચાવી નંગ ૫ મળી આવતા વધુ પુછપરછ તેઓએ ચોરી કરી હોવાની કબુલાત આપી હતી તેમજ અન્ય બે ઇસમો પણ ત્યાં જ ઉભા હોવાની કબુલાત આપતા ચારેય ઇસમ મયુરભાઈ ઈશ્વરભાઈ કોટવાલ અને વરૂણભાઈ મનસુખભાઈ ડોડીયા રહે-દરબાર ગઢ નાગનાથ શેરી મોરબી અને જયભાઈ ઉર્ફે શની પ્રવીણભાઈ સોલંકી રહે મહેન્દ્રનગર તો અભિષેકભાઈ કિશોરભાઈ દેવમુરારીને રોકડ રકમ રૂ.૭,૦૧,૫૦૦, મોબાઈલ ફોન નંગ ૪ કીમત રૂ.૬૦,૦૦૦, હોન્ડા સાઈન કીમત રૂ.૪૦,૦૦૦, ટોપી નંગ ૧ નંગ, રૂમાલ નંગ ૧, કાળું કપડું નંગ ૧ અને ચાવી નંગ ૫ એમ કુલ મુદામાલ કીમત રૂ.૮,૦૧,૫૦૦ કબજે કરી વધુ તપાસ હાથ ધરી છે.
પકડાયેલ આરોપી જય સોલંકી અને અભિષેક દેવમુરારી બંને લાઈટ માઈક્રો ફાઈનાન્સ પેઢીમાં નોકરી કરતા હતા અને ઓફિસમાં રાખવામાં આવતી રોકડ રકમની માહિતી તથા ડુપ્લીકેટ ચાવીઓ બનાવી આરોપી મયુર કોટવાલ અને વરુણ ડોડીયા એ મોડી રાત્રીના ઓફીસના તાળા તોડી ચોરીને અંજામ આપ્યો હતો.
(2:23 PM IST)
છેલ્લા 8 દિવસમાં સૌથી લોકપ્રિય 
