જામનગર તા. ૭: સૈનિક સ્‍કૂલ બાલાચડીમાં ૭૭મો ‘‘ભારતીય સેના દિવસ'' ઉજવવામાં આવ્‍યો હતો, જેમાં ફરજ બજાવતા પોતાના જીવનું બલિદાન આપનારા સૈનિકોને શ્રદ્ધાંજલિ આપવામાં આવી હતી. આ દિવસ ૧૯૪૯ માં બ્રિટિશ જનરલ સર ફ્રાન્‍સિસ બુચર પાસેથી ભારતીય સેનાના પ્રથમ કમાન્‍ડર-ઇન-ચીફ તરીકે જનરલ (બાદમાં ફિલ્‍ડ માર્શલ) કેએમ કરિયપ્‍પાની યાદમાં પણ ઉજવવામાં આવે છે.

આ ખાસ દિવસે શાળાના શૌર્ય સ્‍તંભ પર પ્રિન્‍સિપાલ કર્નલ શ્રેયશ મહેતા દ્વારા પુષ્‍પાંજલિ અર્પણ કરવામાં આવી હતી. શાળાના ધોરણ XI કેડેટ્‍સ દ્વારા પાવર પોઈન્‍ટ પ્રેઝન્‍ટેશન દ્વારા ભારતીય સેનાના વિવિધ પાસાઓ અને મહત્‍વ પર પ્રેઝન્‍ટેશન રજૂ કરવામાં આવ્‍યું હતું. કેડેટ્‍સે ભારતીય સેનાનો ઇતિહાસ, વિવિધ યુદ્ધો અને કામગીરી, ભારતીય સેનાની સિદ્ધિઓ અને યોગદાનને સારી રીતે સમજાવ્‍યું હતું. આ પ્રસંગે વિવિધ પ્રેરક વિડિઓઝ પણ પ્રદર્શિત કરવામાં આવ્‍યા હતા. મુખ્‍ય મહેમાન, કર્નલ શ્રેયશ મહેતા, પ્રિન્‍સિપાલ, સૈનિક સ્‍કૂલ બાલાચડીએ તેમના સંબોધનમાં દરેકને ખૂબ જ ખુશ અને ગૌરવપૂર્ણ આર્મી ડેની શુભેચ્‍છા પાઠવી અને બધા પ્રસ્‍તુતકર્તાઓને અભિનંદન આપ્‍યા. તેમણે કેડેટ્‍સને સશષા સેવામાં જોડાવા માટે તમામ પ્રયાસો કરવાની સલાહ પણ આપી.