ધોરાજી: ધોરાજી વિશ્વ હિન્દુ પરિષદ દ્વારા આવતીકાલે રવિવાર, 6 એપ્રિલ 2025ના રોજ રામનવમીના પવિત્ર પર્વ નિમિત્તે એક વિશાળ શોભાયાત્રાનું આયોજન કરવામાં આવ્યું છે. આ ઉપરાંત શહેરમાં રામ ભક્તિનો ઉત્સાહ ચરમસીમાએ જોવા મળી રહ્યો છે, જ્યાં ધોરાજી નગરને કેસરિયા રંગથી સુશોભિત કરવામાં આવ્યું છે. શોભાયાત્રામાં તમામ હિન્દુ સમાજના શણગારેલા ફ્લોટ્સ જોડાશે, જે ધોરાજીની ધર્મપ્રેમી જનતા માટે આકર્ષણનું કેન્દ્ર બનશે.

વિશ્વ હિન્દુ પરિષદ ધોરાજી પ્રખંડની એક બેઠકમાં આગામી ઉત્સવોની ઉજવણીનું આયોજન કરવામાં આવ્યું હતું, જેમાં રામનવમી શોભાયાત્રા ઉપરાંત પરિષદના પ્રશિક્ષણ વર્ગોની માહિતી પણ આપવામાં આવી હતી. આ બેઠકમાં બજરંગ દળ દ્વારા ધોરાજીમાં ચાલતા હનુમાન ચાલીસા કેન્દ્રોની જવાબદારી કાર્યકર્તાઓને સોંપવામાં આવી છે. નિર્ણય લેવાયો કે હનુમાન ચાલીસા કેન્દ્રો ધોરાજીના દરેક વિસ્તારમાં સ્થાપિત થાય, જેથી ધાર્મિક જાગૃતિ વધે.
 
આવતીકાલે સવારે 7:00 કલાકે રામ મંદિર ખાતે પૂજ્ય સંતો અને આગેવાનોના હસ્તે પૂજન તથા આરતીનો કાર્યક્રમ યોજાશે, જે બાદ શોભાયાત્રાનું પ્રસ્થાન થશે. આ શોભાયાત્રા જમનાવડ રોડ, પોસ્ટ ઓફિસ ચોક, ગેલેક્સી ચોક, અવેડા ચોક, શાક માર્કેટ, મેન બજાર, દરબારગઢ, ત્રણ દરવાજા અને સ્ટેશન રોડ થઈને પુનઃ રામ મંદિરે પરત ફરશે. ત્યારબાદ બપોરે 12:00 કલાકે રામ મંદિર ખાતે રામ જન્મોત્સવની ભવ્ય મહાઆરતીનું આયોજન કરવામાં આવ્યું છે, જેમાં મોટી સંખ્યામાં શ્રદ્ધાળુઓ જોડાવાની અપેક્ષા છે.
 
ધોરાજી શહેરમાં શોભાયાત્રાની તૈયારીઓ જોરશોરથી ચાલી રહી છે. વિવિધ વિસ્તારોના યુવક મંડળો હિન્દુ ધર્મની અલગ-અલગ ઝાંખીઓ દર્શાવતા ફ્લોટ્સને શણગારી રહ્યા છે. શહેરને ધજા, પટાકા, બેનર અને લાઈટ ડેકોરેશનથી કેસરિયા રંગે શણગારવામાં આવી રહ્યું છે. ખાસ કરીને ધોરાજીના ક્રિષ્ના ગ્રુપ દ્વારા સ્ટેશન રોડને કેસરિયો બનાવવાનું કામ ચાલી રહ્યું છે, જેમાં કે.પી. માવાણી, વિજયભાઈ (જલારામ બેકરી), યસ માવાણી, ભોલાભાઈ માવાણી સહિતની ટીમ સક્રિયપણે જોડાઈ છે.
 
રામ મંદિર ખાતે સવારે 8:00થી રાત્રે 8:00 સુધી અખંડ રામ નામ સંકીર્તનનું આયોજન કરવામાં આવ્યું છે, જે છેલ્લાં ઘણાં વર્ષોથી શ્રી રામચંદ્ર ધૂન મંડળ અને દરિદ્ર નારાયણ સેવા ટ્રસ્ટ દ્વારા યોજાય છે. આ વર્ષે પણ આ પરંપરા જળવાઈ રહેશે. બપોરે 12:00 કલાકે રામ જન્મ મહોત્સવની ભવ્ય ઉજવણી થશે, જેમાં ધોરાજીની ધર્મપ્રેમી જનતાને લાભ લેવા આમંત્રણ આપવામાં આવ્યું છે.
 
વિશ્વ હિન્દુ પરિષદના જિલ્લા મંત્રી પ્રફુલભાઈ જાની, પ્રખંડ મંત્રી દીક્ષિતભાઈ ગાંધી અને સમગ્ર ટીમ દ્વારા સમસ્ત હિન્દુ સમાજને શોભાયાત્રા અને મહાઆરતીમાં સહ પરિવાર જોડાવા ઉત્સાહભેર જાહેર આમંત્રણ આપવામાં આવ્યું છે. આ પ્રસંગે ધોરાજીના નાગરિકોમાં ભારે ઉત્સાહ જોવા મળી રહ્યો છે, અને આ શોભાયાત્રા શહેરના ધાર્મિક ઈતિહાસમાં એક યાદગાર ઘટના બની રહેવાની અપેક્ષા છે.