કિશોરભાઈ રાઠોડ દ્વારા, ધોરાજી: રામનવમીના પાવન પર્વ નિમિત્તે ધોરાજી શહેરમાં વિશ્વ હિન્દુ પરિષદ (વીએચપી) અને બજરંગ દળ દ્વારા એક કિલોમીટર લાંબી ભવ્ય શોભાયાત્રાનું આયોજન કરવામાં આવ્યું હતું. આ ઐતિહાસિક શોભાયાત્રામાં 51થી વધુ શણગારેલા ફ્લોટ સાથે સમસ્ત હિન્દુ સમાજના આગેવાનો અને નાગરિકોએ ભાગ લીધો હતો. શહેરના પ્રાચીન રામ મંદિરથી સવારે 7 વાગ્યે મહા આરતી સાથે શોભાયાત્રાનો પ્રારંભ થયો અને બપોરે 12 વાગ્યે ફરી રામ મંદિર ખાતે તેની પૂર્ણાહુતિ થઈ હતી. આ દરમિયાન, નવનિયુક્ત એસપી સીમરન ભારદ્વાજના માર્ગદર્શન હેઠળ સઘન પોલીસ બંદોબસ્ત ગોઠવવામાં આવ્યો હતો, જેથી કાયદો અને વ્યવસ્થા જળવાઈ રહે.  
 
ધોરાજીના રામ મંદિર ખાતે સવારે 7 વાગ્યે વિશ્વ હિન્દુ પરિષદના જિલ્લા મંત્રી પ્રફુલભાઈ જાની, મનીષભાઈ સોલંકી, દીક્ષિતભાઈ ગાંધી સહિતના આગેવાનોએ સાધુ-સંતોની હાજરીમાં મહા આરતી યોજી હતી. આ પછી "જય શ્રી રામ"ના નારા સાથે શોભાયાત્રાનો શુભારંભ થયો. શોભાયાત્રામાં ધોરાજી માર્કેટિંગ યાર્ડના ચેરમેન હરકિશનભાઈ માવાણી, અખિલ ભારતીય વિશ્વકર્મા મહાસંભાના રાષ્ટ્રીય અગ્રણી કિશોરભાઈ રાઠોડ, ધોરાજી વેપાર ઉદ્યોગ મહામંડળના પ્રમુખ લલીતભાઈ વોરા, નગરપાલિકા પ્રમુખ પાયલબેન ધોળકિયા, ઉપપ્રમુખ ચિન્ટુભાઈ રણછોડભાઈ કોયાણી, કારોબારી ચેરમેન સી.સી. અંટાળા, ભાજપના યુવા અગ્રણી વિમલભાઈ કોયાણી, ભૂપતભાઈ કોયાણી, મહામંત્રી જયંતીભાઈ કોયાણી, પૂર્વ નગરપતિ કે.પી. માવાણી, સમસ્ત કડિયા સમાજના પ્રમુખ રાજુભાઈ યાદવ સહિતના મહાનુભાવો ઉપસ્થિત રહ્યા હતા.  
 
શોભાયાત્રા રામ મંદિર ચોકથી શરૂ થઈ જમનાવડ રોડ, પોસ્ટ ઓફિસ ચોક, ગેલેક્સી ચોક, ડો. બાબાસાહેબ આંબેડકરની પ્રતિમા પાસે પહોંચી, જ્યાં દલિત સમાજના આગેવાનો અશોકભાઈ સુંદરવા, રાજુભાઈ બગડા, રાઠોડભાઈએ સ્વાગત કર્યું. ત્યારબાદ જેતપુર રોડ પર રાજકોટ નાગરિક બેંક નજીક સમસ્ત રાજપૂત સમાજે, ખાડિયા ચાર ધોકા ચોક ખાતે બજરંગ ગ્રૂપે, માધવ ગૌશાળા ખાતે ગૌસેવકોએ, શાકમાર્કેટ, સોની બજાર, દરબારગઢ, સિંધી કાપડ બજાર, ત્રણ દરવાજા અને સ્ટેશન રોડ થઈ શોભાયાત્રા ફરી રામ મંદિર પહોંચી. રસ્તામાં 15થી 20 સ્થળોએ સમાજના લોકોએ શરબત, નાસ્તા, આઈસ્ક્રીમ અને ઠંડા પીણાંના સ્ટોલ ગોઠવી વિનામૂલ્યે સેવા આપી હતી.  
 
શોભાયાત્રામાં 51થી વધુ શણગારેલા ફ્લોટ ખાસ આકર્ષણનું કેન્દ્ર રહ્યા. આ ફ્લોટમાં રામાયણના પ્રસંગો, હિન્દુ સંસ્કૃતિ અને ધર્મની ઝાંખી રજૂ કરવામાં આવી હતી. ધોરાજીના સમસ્ત હિન્દુ સમાજની વિવિધ જ્ઞાતિઓએ પોતાની કળા અને ભક્તિ દ્વારા આ ફ્લોટને ખાસ બનાવ્યા હતા. "જય શ્રી રામ"ના નારા સાથે શહેરની ગલીઓ ગુંજી ઉઠી હતી.  
 
કાયદો અને વ્યવસ્થા જાળવવા માટે નવનિયુક્ત એસપી સીમરન ભારદ્વાજના નેતૃત્વમાં ધોરાજી પોલીસે સઘન બંદોબસ્ત ગોઠવ્યો હતો. પોલીસ ઈન્સ્પેક્ટર રવિ ગોધમ, પીએસઆઈ પ્રતીક ગોહિલ, પીએસઆઈ વિક્રમસિંહ જેઠવા, ડિસ્ટર્બ નારણભાઈ પંપાણિયા, એલઆઈબીના રમણીકભાઈ મનોવર સહિતના સ્ટાફે સતત પેટ્રોલિંગ કરી શાંતિપૂર્ણ વાતાવરણ સુનિશ્ચિત કર્યું હતું.  
 
બપોરે 12 વાગ્યે શોભાયાત્રા ફરી રામ મંદિર ખાતે પહોંચી, જ્યાં ભગવાન શ્રી રામનો જન્મોત્સવ મહા આરતી સાથે ભવ્ય રીતે ઉજવવામાં આવ્યો. આ પ્રસંગે વિશ્વ હિન્દુ પરિષદના અગ્રણી પ્રફુલભાઈ જાનીએ સમસ્ત હિન્દુ સમાજના આગેવાનો અને નાગરિકોનો આભાર માન્યો હતો. તેમણે જણાવ્યું કે, આ શોભાયાત્રા ધોરાજીના હિન્દુ સમાજની એકતા અને ભક્તિનું પ્રતીક બની રહી.  
 
આ શોભાયાત્રા ધોરાજીના ઇતિહાસમાં એક યાદગાર ઘટના તરીકે નોંધાઈ છે. સમાજના તમામ વર્ગોએ એકસાથે આવીને રામનવમીની ઉજવણીમાં ભાગ લીધો, જે શહેરની સામાજિક સંવાદિતાનું ઉદાહરણ બન્યું.