વિનોદ ગાલા દ્વારા, ભુજ : કચ્છ જિલ્લાના ભુજ શહેરમાં આજે મોડી સાંજે અચાનક વાતાવરણમાં પલટો આવ્યો હતો. ભારે ગરમી વચ્ચે ઠંડા પવન સાથે ધોધમાર વરસાદ તૂટી પડ્યો હતો. માત્ર પોણા કલાકના ટૂંકા ગાળામાં જ દોઢથી બે ઇંચ જેટલો વરસાદ વરસતાં વૈશાખ મહિનામાં અષાઢી માહોલ સર્જાયો હતો.
ભુજમાં વારંવાર જોવા મળતી સમસ્યા મુજબ, ભારે વરસાદના કારણે શહેરના મુખ્ય રસ્તાઓ પર પાણી ભરાઈ ગયા હતા અને અનેક જગ્યાએ ખાડાઓના કારણે વાહનચાલકો ભારે મુશ્કેલીમાં મુકાયા હતા. મોડી સાંજ સુધી મોટા ઝાપટાઓ સાથે વરસાદ ચાલુ રહેતા લોકોને અવરજવરમાં પણ હાલાકીનો સામનો કરવો પડ્યો હતો.