ભાવનગર, ૦૯ જૂન ૨૦૨૫: ભાવનગર જિલ્લાના ઘોઘા તાલુકાના મોટા ખોખરા ગામના પનોતા પુત્ર અને ભારતીય સેનાના અગ્નિવીર જવાન જયદીપ ડાભી જમ્મુ-કાશ્મીર ખાતે દેશની સરહદ પર ફરજ બજાવતી વખતે વીરગતિ પામ્યા હોવાના દુઃખદ સમાચાર મળતા સમગ્ર પંથકમાં શોકનો માહોલ છવાઈ ગયો છે. આજે વીર શહીદ અગ્નિવીર જયદીપ ડાભીનું પાર્થિવ દેહ સંપૂર્ણ લશ્કરી સન્માન સાથે પંચમહાભૂતમાં વિલીન થયું હતું.
શહીદના પાર્થિવ દેહને વતન લાવવામાં આવ્યો:
દેશની સરહદ પર એરડિફેન્સ રેજિમેન્ટમાં સેવા આપતા જયદીપ ડાભીનો પાર્થિવ દેહ જમ્મુથી હવાઈ માર્ગે અમદાવાદ લાવવામાં આવ્યો હતો. ત્યારબાદ, રોડ માર્ગે શહીદ જવાનના પાર્થિવ દેહને ગઈકાલે ભાવનગરની સર ટી. હોસ્પિટલ ખાતે લાવવામાં આવ્યો હતો. આ બાદ, ભારતીય સેનાના વિશેષ વાહનમાં સંપૂર્ણ સન્માન સાથે તેમના પાર્થિવ દેહને મોટા ખોખરા ગામ લઈ જવામાં આવ્યો હતો.
અંતિમ યાત્રામાં ઉમટી પડ્યા ગ્રામજનો:
શહીદ જયદીપ ડાભીના પાર્થિવ દેહને વતન લાવવામાં આવતા જ સમગ્ર મોટા ખોખરા ગામમાં ગમગીની છવાઈ ગઈ હતી. ગ્રામજનો પોતાના વીર પુત્રના અંતિમ દર્શન કરવા અને તેને અંતિમ વિદાય આપવા માટે મોટી સંખ્યામાં ઉમટી પડ્યા હતા. "જય જવાન", "શહીદ અમર રહો" ના નારાઓથી વાતાવરણ ગુંજી ઉઠ્યું હતું.
સંપૂર્ણ લશ્કરી સન્માન સાથે અંતિમ સંસ્કાર:
દેશ માટે સર્વોચ્ચ બલિદાન આપનાર શહીદ જવાન જયદીપ ડાભીના અંતિમ સંસ્કાર ગામમાં સંપૂર્ણ રાષ્ટ્રીય સન્માન અને ગાર્ડ ઓફ ઓનર સાથે કરવામાં આવ્યા હતા. સેનાના જવાનો દ્વારા શહીદને સલામી આપવામાં આવી હતી, જે એક વીર સપૂતના બલિદાનને શ્રદ્ધાંજલિ હતી. જયદીપ ડાભીના બલિદાનને દેશ કાયમ યાદ રાખશે અને તેમનું શૌર્ય યુવાનોને પ્રેરણા આપતું રહેશે.