( વિપુલ હિરાણી દ્વારા) ભાવનગર: તા.૫ સપ્ટેમ્બર શિક્ષક દિન નિમિત્તે રાજ્યભરમાંથી પસંદ કરેલા શ્રેષ્ઠ શિક્ષકોને સન્માનિત કરવામાં આવે છે. આ વર્ષે પણ અમદાવાદ ખાતે મુખ્યમંત્રીની ઉપસ્થિતિમાં ટાગોર હૉલ ખાતે આ સન્માન સમારોહ યોજાઈ ગયો.

આ સમારોહમાં ખાસ શિક્ષક કે જેવો દિવ્યાંગો માટે, દિવ્યાંગો સાથે કામ કરી રહ્યા છે તેવા સંવેદનાસભર શિક્ષકોની શ્રેણીમાં ભાવનગરની કે. એલ. ઇન્સ્ટિટ્યૂટ ફોર ધ ડેફ (બહેરાં-મૂંગા શાળા) ના ડો. કવિતા પારસ શાહની પસંદગી થઈ હતી.‌ ઉલ્લેખનીય છે કે સમગ્ર રાજ્યમાંથી આ શ્રેણીમાં એકમાત્ર ભાવનગરના આ શિક્ષિકા પસંદ થયા હતા.
મુખ્યમંત્રી ભુપેન્દ્રભાઈ પટેલના હસ્તે તેમને એવોર્ડ, શાલ તથા રૂ. 51000/- પુરસ્કાર રકમ આપી સન્માનિત કરવામાં આવ્યાં હતાં. આ પ્રસંગે મુખ્યમંત્રી તથા અન્ય મહાનુભાવોએ પણ ખાસ શિક્ષક તરીકે કામ કરતા શિક્ષકોની કામગીરીને બિરદાવી આ ક્ષેત્રમાં કામ કરતા સહુને શુભકામનાઓ પાઠવી હતી