સુરેન્દ્રનગર,તા.૨૯

સુરેન્દ્રનગર જિલ્લામાં ફૂડ એન્ડ ડ્રગ્સ વિભાગ (FDA) અને મામલતદાર ટીમ દ્વારા હાઇવે પર આવેલી હોટલો, મીઠાઇની દુકાનો અને ફરસાણની દુકાનો પર વ્યાપક ચેકિંગ હાથ ધરવામાં આવ્યું હતું. આ અચાનક હાથ ધરાયેલા ચેકિંગને કારણે ખાદ્ય સામગ્રીમાં ભેળસેળ કરનારા અને ગેરરીતિ આચરતા વેપારીઓમાં ફફડાટ વ્યાપી ગયો છે.ચેકિંગ દરમિયાન લખતર આજુબાજુના હાઇવે પર આવેલી એક હોટલમાં ચોંકાવનારી વિગતો સામે આવી હતી. આ હોટલમાંથી એક્સપાયરી ડેટ (મુદત વીતી ગયેલું) પનીર મોટી માત્રામાં મળી આવ્યું હતું. લોકોના સ્વાસ્થ્ય સાથે ચેડાં કરતી આ વસ્તુનો ટીમે સ્થળ પર જ નાશ કર્યો હતો.

ફૂડ એન્ડ ડ્રગ્સ વિભાગ અને મામલતદારની ટીમે લખતર અને તેની આજુબાજુના મીઠાઇ-ફરસાણ, ખાણીપીણી અને હાઇવે હોટલો પર સઘન ચેકિંગ કર્યું હતું. આ ચેકિંગ દરમિયાન ટીમે ૩૫ નમૂનાઓ (સેમ્પલ) એકત્ર કર્યા હતા, જેમાં વિવિધ ખાદ્ય વસ્તુઓ અને તેલના નમૂનાઓનો સમાવેશ થાય છે. આ તમામ નમૂનાઓને પૃથક્કરણ (લેબોરેટરી ટેસ્ટ) માટે મોકલી આપવામાં આવ્યા છે, જેનો રિપોર્ટ આવ્યા બાદ વધુ કાર્યવાહી હાથ ધરાશે. ટીમ દ્વારા માત્ર ખાદ્ય વસ્તુઓની ગુણવત્તા જ નહીં, પરંતુ દુકાનો અને હોટલોમાં સાફ-સફાઈ અને એક્સપાયરી ડેટવાળી વસ્તુઓ રાખવામાં આવે છે કે કેમ, તેની પણ ઝીણવટભરી તપાસ કરવામાં આવી હતી. તંત્રની આ કાર્યવાહીથી લોકોને શુદ્ધ અને ગુણવત્તાયુક્ત ખોરાક મળી રહે તે માટે સતર્કતા દાખવવામાં આવી છે.