મોરબી જિલ્લાના હળવદમાં લાંબા સમયથી તંત્ર-મંત્ર અને દોરા-ધાગાના નામે અંધશ્રદ્ધા ફેલાવતા ભૂવા ફિરોઝ સંધિનો પર્દાફાશ થયો છે. ગુજરાત રાજ્યની અંધશ્રદ્ધા વિરોધી સંસ્થા વિજ્ઞાનજાથાની ટીમે તેને રંગેહાથ ઝડપી પાડ્યો હતો. આ ભૂવો છેલ્લા એક દાયકાથી ભોળી પ્રજાને ડરાવી-ધમકાવીને આર્થિક શોષણ કરતો હતો. 

વિજ્ઞાન જાથાની ટીમ જ્યારે આ સ્થળ પર દરોડા પાડવા પહોંચી, ત્યારે ભૂવાના સમર્થકો સાથે તેમની નજીવું ઘર્ષણ થયું હતું. જોકે, પોલીસે દરમિયાનગીરી કરીને પરિસ્થિતિને કાબૂમાં લીધી હતી. વિજ્ઞાનજાથાએ આ અંધશ્રદ્ધા ફેલાવતા ભૂવા વિરુદ્ધ હળવદ પોલીસ સ્ટેશનમાં પોલીસ ફરિયાદ નોંધાવીને કાયદેસરની કાર્યવાહી શરૂ કરાવી છે. આ ઘટનાથી હળવદ પંથકમાં ચકચાર મચી ગઈ છે.