વિનોદ ગાલા દ્વારા: પતિ-પત્નીના સંબંધોમાં વધતી તંગદિલી અને નાણાકીય વિવાદો કેવો કરુણ અંજામ લાવી શકે છે, તેનો એક હૃદયદ્રાવક કિસ્સો કચ્છના ભુજ તાલુકાના સામત્રા ગામે સામે આવ્યો છે. અહીં એક પત્નીએ પૈસાની માંગણી પૂરી ન થતાં આવેશમાં આવીને પોતાના ૬૦ વર્ષીય પતિ પર કેરોસીન છાંટી જીવતા સળગાવી દેવાનો સનસનીખેજ પ્રયાસ કર્યો છે, જેના પગલે સમગ્ર વિસ્તારમાં ચકચાર મચી ગઈ છે.
લગ્ન અને વિવાદનું મૂળ:
સામત્રા ગામના રહેવાસી ૬૦ વર્ષીય પાટીદાર પ્રૌઢ ધનજી ઉર્ફે ખીમજી વિશ્રામ કેરાઈ પ્રથમ પત્નીના અવસાન બાદ વિધુર હતા. દોઢ વર્ષ પહેલા તેમણે મહેસાણાના હીરપુરા ગામની છૂટાછેડા લીધેલ મહિલા કૈલાસ કનુસિંહ ચૌહાણ સાથે બીજા લગ્ન કર્યા હતા. ધનજીભાઈને ત્રણ પુત્રો છે, જેમાંથી બે વિદેશમાં રહે છે અને એક પુત્ર કપિલ ગામમાં જ પિતાથી અલગ રહે છે.
રૂપિયા અને દાગીનાનો કંકાસ:
લગ્ન બાદ કૈલાસે ધનજીભાઈની પહેલી પત્નીના તમામ દાગીના પોતાની પાસે લઈ લીધા હતા. આ પછી તેણે ભુજમાં પોતાનું મકાન લીધું હોઈ, પતિ પાસેથી વારંવાર રૂપિયાની માંગણી કરતી હતી. દાગીના અને રૂપિયાની આ જ બાબતને લઈને પતિ-પત્ની વચ્ચે સતત કંકાસ રહેતો હતો.
પત્નીનું સનસનીખેજ કૃત્ય:
વિવાદ વધુ વકરતા, ગઈકાલે કૈલાસે ફરી એકવાર પતિ ધનજીભાઈ પાસેથી મકાન માટે પૈસાની માંગણી કરી હતી. પતિએ પૈસા આપવાની સ્પષ્ટ ના પાડતા, પત્ની કૈલાસ ઉશ્કેરાઈ ગઈ. તેણે ધનજીભાઈને સીધું કહ્યું કે, "આજે તો તને પતાવી નાખવો છે." આ કહીને તેણે પતિ પર કેરોસીન છાંટ્યું અને દિવાસળી ચાંપી દીધી.
પતિની ગંભીર હાલત:
સળગતા પતિ ધનજી ઉર્ફે ખીમજીભાઈની બૂમો સાંભળીને પાડોશીઓ અને બાજુમાં રહેતો પુત્ર કપિલ તાત્કાલિક દોડી આવ્યા હતા. ધનજીભાઈ ૯૦ ટકા જેટલા ગંભીર રીતે દાઝી ગયા છે અને તેમની હાલત નાજુક હોવાનું જાણવા મળ્યું છે. તેમને સારવાર માટે હોસ્પિટલમાં ખસેડવામાં આવ્યા છે.
માનકુવા પોલીસે તાત્કાલિક કાર્યવાહી હાથ ધરીને આરોપી પત્ની કૈલાસ કનુસિંહ ચૌહાણની અટકાયત કરવાની તજવીજ હાથ ધરી છે. રૂપિયા અને વૈભવી જીવનની લાલચમાં પત્નીના આઘાતજનક કૃત્યએ પરિવાર તેમજ ગામમાં શોક અને આક્રોશની લાગણી ફેલાવી દીધી છે.