મોરબી: માળિયા (મી.) પંથકમાં માર્ગ અકસ્માતની વધુ એક કરૂણ ઘટના સામે આવી છે, જેમાં મોટાભેલા ગામથી ભાવપર ગામ તરફ જઈ રહેલા એક યુવાને જીવ ગુમાવ્યો છે. ગત તારીખ ૦૫-૧૦-૨૦૨૫ ના રોજ સાંજના સમયે આ અકસ્માત થયો હતો. પોલીસે મૃતકના પરિવારની ફરિયાદના આધારે કાયદેસરની કાર્યવાહી હાથ ધરી છે.
આ અંગે માળિયા (મી.) ના સરવડ ગામે રહેતા ભાનુબેન કારાભાઈ મુછ્ડીયાએ પોલીસ ફરિયાદ નોંધાવી છે. તેમના દીકરા, કિશોર મુછ્ડીયા (ઉ.વ. ૩૫) ગત ૦૫ ઓક્ટોબરના રોજ સાંજે પોણા સાતેક વાગ્યે પોતાનું બાઇક (GJ 36 AN 9653) લઈને મોટા ભેલા અને ભાવપર ગામ વચ્ચેથી પસાર થઈ રહ્યા હતા. ગાય માતાના મંદિર પાસે કોઈક કારણોસર તેમણે બાઇક પરનો કાબૂ ગુમાવ્યો હતો.
કાબૂ ગુમાવતા તેમનું બાઇક રોડ પર સ્લીપ થયું હતું. આ અકસ્માતને કારણે કિશોર મુછ્ડીયાને ગંભીર ઈજાઓ પહોંચી હતી. તાત્કાલિક સારવાર માટે હોસ્પિટલ ખસેડવામાં આવ્યા હોવા છતાં, તેમનું સારવાર દરમિયાન કરૂણ મૃત્યુ થયું હતું.
માળિયા પોલીસે આ અકસ્માત અંગે ફરિયાદ નોંધી લીધી છે અને બનાવની વધુ તપાસ હાથ ધરી છે. આ કરૂણ ઘટનાથી મૃતકના પરિવારમાં ઊંડો શોક છવાઈ ગયો છે.