વેરાવળ નજીક આદરી ગામના દરિયા કિનારે આજે શુક્રવારે સાંજે એક અત્યંત દુઃખદ ઘટના બની હતી. પ્રી-વેડિંગ શૂટ માટે આવેલા કપલ સાથે તેમની સહેલીઓ પણ હતી. પાંચ લોકો કિનારે પથ્થર પર ઉભા રહી સેલ્ફી લઈ રહ્યા હતા, ત્યારે સમુદ્રનું એક મોટું મોજું આવ્યું હતું. ચાર લોકોએ એકબીજાના હાથ પકડી લેતા તેઓ બચી ગયા, પરંતુ જૂનાગઢની ૨૨ વર્ષીય કાજલ સોલંકી નામની યુવતી દરિયાના પ્રવાહમાં તણાઈ ગઈ હતી. ઘટનાની જાણ થતાં મરીન પોલીસ અને સ્થાનિક માછીમારોએ તાત્કાલિક શોધખોળ શરૂ કરી હતી.
વિગતવાર જોઈએ તો ગીર સોમનાથ જિલ્લાના વેરાવળ તાલુકામાં આવેલા આદરી ગામના દરિયા કિનારે શુક્રવારની સાંજ એક પરિવાર અને મિત્ર વર્તુળ માટે કાળ બનીને આવી હતી. પ્રી-વેડિંગ ફોટોશૂટનો આનંદ ક્ષણભરમાં માતમમાં ફેરવાઈ ગયો, જ્યારે સમુદ્રના એક રાક્ષસી મોજાએ જૂનાગઢની એક યુવતીનો ભોગ લીધો.
પ્રાપ્ત માહિતી અનુસાર, જૂનાગઢમાં રહેતી અને મૂળ ઉનાના ગરાળ ગામની ૨૨ વર્ષીય યુવતી કાજલ લખુભાઈ સોલંકી, તેની સહેલીના પ્રી-વેડિંગ શૂટ માટે વેરાવળ-આદરી દરિયા કિનારે આવી હતી. જે યુગલના લગ્ન થવાના હતા, તેઓ અને તેમની સાથે કાજલ સહિત અન્ય મિત્રો, આમ કુલ પાંચ લોકો દરિયા કિનારે ફોટોગ્રાફી અને સેલ્ફી લઈ રહ્યા હતા.
સાંજના સમયે, પાંચેય જણા કિનારા નજીક આવેલા એક પથ્થર (શિલા) પર ઉભા રહીને મોબાઇલમાં સેલ્ફી લેવામાં મશગૂલ હતા. આ દરમિયાન અચાનક જ સમુદ્રમાંથી એક શક્તિશાળી મોજું આવ્યું અને પાંચેયને લપેટમાં લઈ લીધા. ગભરાટના માહોલમાં ચાર લોકોએ સમયસૂચકતા વાપરી એકબીજાના હાથ મજબૂતીથી પકડી લીધા, જેના કારણે તેઓ મોજાના પ્રહાર છતાં બચવામાં સફળ રહ્યા અને કિનારા તરફ ફંગોળાયા.
પરંતુ, કમનસીબે કાજલ સોલંકીનો હાથ છૂટી ગયો અને દરિયાનું તેજ મોજું તેને ઊંડા પાણી તરફ ખેંચી ગયું. પોતાની નજર સામે જ સહેલીને દરિયામાં તણાતી જોઈને અન્ય મિત્રો અને કપલ સ્તબ્ધ થઈ ગયા અને તેઓએ બૂમાબૂમ કરી મૂકી.
ઘટનાને પગલે આસપાસના સ્થાનિક લોકો અને માછીમારો દોડી આવ્યા હતા. તાત્કાલિક ધોરણે વેરાવળ મરીન પોલીસને આ દુર્ઘટનાની જાણ કરવામાં આવી હતી. મરીન પોલીસનો કાફલો તરત જ ઘટનાસ્થળે પહોંચી ગયો હતો અને સ્થાનિક તરવૈયાઓ તેમજ માછીમારોની મદદ લઈને દરિયામાં યુવતીની શોધખોળ માટે સઘન ઓપરેશન શરૂ કર્યું હતું. મોડે સુધી યુવતીની ભાળ મેળવવાના પ્રયાસો ચાલુ રહ્યા હતા. 
આ હૃદયદ્રાવક ઘટનાને પગલે સમગ્ર પંથકમાં અરેરાટી વ્યાપી ગઈ છે.