(વિનોદ ગાલા દ્વારા)ભુજ તા.૮ :  એકના ડબલ અને નકલી નોટોના નામે ઝડપથી રૂપિયા કમાવવાની લાલચ આપી સોશ્યલ મીડિયાના માધ્યમથી લોકો સાથે ચિટિંગ કરનાર ટોળકી પૂર્વ કચ્છ એલસીબી એ ઝડપી લીધી છે. ગાંધીધામ બસ સ્ટેશન ઉપરથી પોલીસે સબીરહુસેન સુલતાન શેખ, રમજાન સાલેમામદ કકલ અને ઈરફાન ગુલામ હુસેન સૈયદને ઝડપી પાડ્યા હતા. ત્રણેય આરોપી અંજાર અને કનૈયાબે (ભુજ) ના છે. એક આરોપી ઇસબશા અલીશા શેખ, અંજાર ફરાર છે. પોલીસે મનોરંજન બેંકની અસલી જેવી લાગતી ૨૪ નકલી નોટો, અલ્ટો કાર, એક્ટિવા સાથે ૪ લાખનો મુદ્દામાલ કબજે કર્યો છે. ઈન્સ્ટાગ્રામ ઉપર રીલ બનાવી લોભિયા લોકોને ઝડપથી રૂપિયા કમાવવાની લાલચમાં ફસાવી રૂપિયા પડાવી લેનાર ચીટર ગેંગો કચ્છમાં સક્રિય છે. જોકે, આ ચીટર ગેંગો ઉપર પોલીસ નજર રાખી તેમની સામે કાયદેસર કાર્યવાહી પણ કરી રહી છે. પરંતુ મોટાભાગના કિસ્સામાં લોકો લાલચુ બની રૂપિયા કમાવી લઈશું એવું સમજી આ ઠગોની જાળમાં ફસાય છે પછી રોવાનો વારો આવે છે.