સુરેન્દ્રનગર જિલ્લાના થાનગઢ નજીક આવેલા તરણેતર ગામના ડેમમાંથી એક યુવકનો મૃતદેહ મળી આવતા સનસનાટી ફેલાઈ ગઈ છે. યુવકનો મૃતદેહ ચારથી પાંચ દિવસથી પાણીમાં રહ્યો હોવાનું પ્રાથમિક અનુમાન છે, પરંતુ સૌથી ચોંકાવનારી વિગત એ છે કે આ મૃતદેહ પથ્થર સાથે બાંધેલી હાલતમાં મળી આવ્યો છે. મૃતદેહ પથ્થરથી બાંધેલો હોવાથી પોલીસે આ ઘટનામાં હત્યાની આશંકા વ્યક્ત કરી છે. બનાવની જાણ થતાં થાનગઢ પોલીસે તાત્કાલિક ઘટના સ્થળે પહોંચીને મૃતદેહનો કબજો લીધો છે અને આ ઘટના હત્યા છે કે આત્મહત્યા, તે દિશામાં સઘન તપાસ શરૂ કરી છે.