(વિનોદ ગાલા દ્વારા) ભુજ, તા.૨૬:  એટીએસ પોલીસ ટીમ દ્વારા ૨૮ જુલાઈ ૨૦૧૯ ના કચ્‍છના માંડવી નજીક કોડાય ગામ પાસેથી બે શખ્‍સોને ૯૭.૬૦ લાખના હેરોઇનના ૯૭૬ ગ્રામ જથ્‍થા સાથે ઝડપ્‍યા હતા. આ બંને આરોપીઓની પૂછપરછમાં તેમને દરિયા કિનારેથી ડ્રગ્‍સનો જથ્‍થો મળ્‍યો હોવાનું ખુલ્‍યું હતું. આ બંને શખ્‍સોએ ૯૬.૫૦ લાખનું ૯૬૫ ગ્રામ હેરોઇન માંડવીના ઇમરાન અબ્‍દુલ કાદર મણીયારને આપ્‍યું હોવાનું ખુલતા એટીએસ પોલીસ ટીમે તેને ૧ ઓગસ્‍ટ ૨૦૧૯ ના ઝડપ્‍યો હતો.

ત્રણેય આરોપીઓ વિરુદ્ધ નાર્કોટિક્‍સ એક્‍ટ હેઠળ ગુનો દાખલ કરાયો હતો. જે કેસમાં ભુજ સ્‍પે કોર્ટે ત્રણેય આરોપીઓને ૨૦ વર્ષની સખત કેદ સાથે ૨ લાખ રૂપિયાનો દંડ ફટકાર્યો છે. જો આરોપીઓ દંડ ન ભરે તો વધુ ૨ વર્ષની સખત કેદની સજા ફટકારી છે. આ ગુનામાં સરકાર તરફે અધિક જિલ્લા સરકારી વકીલ સુરેશ એ. મહેશ્વરીએ દલીલો કરી હતી.