જામનગર:જામનગર જિલ્લા હોમગાર્ડઝ દ્વારા તા. ૬ ડિસેમ્બર, ૨૦૨૫ના રોજ હોમગાર્ડઝ સ્થાપના દિવસની શાનદાર ઉજવણી શહેરના ટાઉનહોલ ખાતે કરવામાં આવી હતી. ઉજવણીના ભાગરૂપે સવારે ૩૭૫થી વધુ હોમગાર્ડઝ સભ્યોએ જિલ્લા હોમગાર્ડઝ કચેરીથી ટાઉનહોલ સુધી પ્રભાતફેરી યોજી હતી. ત્યારબાદ નાયબ નિયંત્રક સિવિલ ડિફેન્સ વી. કે. ઉપાધ્યાય અને જિલ્લા કમાન્ડન્ટ ગીરીશ સરવૈયા સહિત નિવૃત્ત હોમગાર્ડઝ અધિકારીઓ દ્વારા દીપ પ્રાગટ્ય કરીને સાંસ્કૃતિક કાર્યક્રમનો શુભારંભ કરવામાં આવ્યો હતો.
વંદે માતરમ્ ગાન સાથે શરૂ થયેલા કાર્યક્રમમાં મહિલા હોમગાર્ડઝ દ્વારા હેલારો રાસ અને ભાઈઓ દ્વારા આદિવાસી નૃત્ય રજૂ કરવામાં આવ્યું હતું. આ ઉપરાંત,ભારતના પ્રધાનમંત્રી નરેન્દ્રભાઈ  મોદીની કામગીરી અને કોરોનાકાળમાં હોમગાર્ડઝ દ્વારા કરવામાં આવેલી ઉત્કૃષ્ટ કામગીરીની સમીક્ષા કરતી એક ક્લિપ પણ દર્શાવવામાં આવી હતી. જિલ્લા હોમગાર્ડઝ કમાન્ડન્ટ ગીરીશ સરવૈયાએ હોમગાર્ડઝના ઇતિહાસ અને વર્ષ દરમિયાનની તમામ કામગીરીની માહિતી આપી મહેમાનોનું શાબ્દિક અભિવાદન અને પુષ્પગુચ્છ દ્વારા સન્માન કર્યું હતું.
આમંત્રિત મહેમાનોના હસ્તે વર્ષ દરમિયાન જુદા જુદા ક્ષેત્રોમાં વિશિષ્ટ કામગીરી કરનાર, મુખ્યમંત્રી મેડલ મેળવનાર તથા રાજ્ય અને નેશનલ કક્ષાએ રમતોત્સવમાં નંબર મેળવનાર હોમગાર્ડઝ સભ્યોને પ્રમાણપત્રો આપી બહુમાન કરવામાં આવ્યું હતું. પ્રમોશન મેળવનાર હોમગાર્ડઝને રેન્ક ધારણ કરાવવામાં આવી હતી. આ ઉપરાંત, ધોરણ ૧૦, ૧૨ અને કોલેજમાં ઉચ્ચ ગુણાંક મેળવનાર હોમગાર્ડઝ સભ્યોના સંતાનોને હોમગાર્ડઝ વેલફેર ફંડમાંથી આવેલ સહાયના ચેકનું વિતરણ કરવામાં આવ્યું હતું.
આ પ્રસંગે નાયબ નિયંત્રક સિવિલ ડિફેન્સ વી. કે. ઉપાધ્યાય, આગેવાન સર્વે શ્રીમતી બીનાબેન કોઠારી અને ડો. વિનોદ ભંડેરીએ હોમગાર્ડઝની સેવાઓને બિરદાવતાં જણાવ્યું હતું કે, "દરેક જગ્યાએ જામનગરની હોમગાર્ડઝ અગ્રેસર હોય છે."
કાર્યક્રમમાં ડે. મેયર શ્રીમતી ક્રિષ્નાબેન સોઢા, અભિષેક પટવા, હોમગાર્ડઝ ઈન્સ્પેક્ટર ઇન્સ્ટ્રક્ટર હાજાભાઈ કડછા, સ્ટાફ ઓફિસર લીગલ રૂષિરાજ જેઠવા, તથા નિવૃત ઇન્સ્ટ્રેક્ટર એમ.બી.કેર, પી.એલ.ખજૂરિયા, અને હેમંત ગોહિલ સહિત અંદાજે ૩૭૫ જેટલા હોમગાર્ડઝ સભ્યો ઉપસ્થિત રહ્યા હતા.સમગ્ર કાર્યક્રમનું સંચાલન નિવૃત્ત અધિકારીઓ સુનિલ ત્રિવેદી અને ચંદ્રવદન મહેતા દ્વારા કરવામાં આવ્યું હતું.