જૂનાગઢ:જૂનાગઢની પવિત્ર ગિરિમાળા આજે વહેલી સવારથી જ 'જય ગિરનારી'ના નાદ અને યુવાનોના જોશથી ગુંજી ઉઠી હતી. 40મી અખિલ ગુજરાત ગિરનાર આરોહણ-અવરોહણ સ્પર્ધાનો પ્રારંભ રાજ્યમંત્રી અને જિલ્લા પ્રભારી પ્રદ્યુમન વાજાના હસ્તે લીલી ઝંડી આપીને કરવામાં આવ્યો હતો. હાડ થીજવતી જાન્યુઆરીની ઠંડીમાં પણ સ્પર્ધકોનો પરસેવો છૂટી જાય તેવો ઉત્સાહ જોવા મળ્યો હતો. ગુજરાતના 11 અલગ-અલગ જિલ્લાઓમાંથી આવેલા 1115 જેટલા ખેલાડીઓએ પર્વતરાજ ગિરનારના પથ્થરોને હંફાવવા અને પોતાની ક્ષમતા સાબિત કરવા માટે દોટ લગાવી હતી. આ દ્રશ્ય એટલું ભવ્ય હતું કે જાણે શક્તિ અને સાહસનો મહાસંગમ જૂનાગઢની ધરતી પર ઉતરી આવ્યો હોય.

આ સ્પર્ધાના નિયમો અને રૂટ અત્યંત પડકારજનક રાખવામાં આવ્યા છે. સીનિયર ભાઈઓ માટે ગિરનારના અંબાજી મંદિર સુધીના આશરે 5500 પગથિયાં ચડવા અને ઉતરવાનું અતિ કઠિન લક્ષ્ય રાખવામાં આવ્યું હતું. જ્યારે સીનિયર-જુનિયર બહેનો અને જુનિયર ભાઈઓ માટે માળી પરબ સુધીના 2200 પગથિયાં નક્કી કરવામાં આવ્યા હતા. સ્પર્ધામાં ભાગ લેવા માટે કુલ 1377 ફોર્મ ભરાયા હતા, પરંતુ દસ્તાવેજોની ચકાસણી દરમિયાન ક્ષતિ જણાતા 259 ફોર્મ રદ કરવામાં આવ્યા હતા. અંતે 1115 સ્પર્ધકો મેદાનમાં ઉતર્યા હતા, જેઓ પોતાની મજબૂત પકડ અને સ્ફૂર્તિથી ગિરનારને સર કરી રહ્યા છે.

લાંબા સમયથી આ સ્પર્ધા સાથે જોડાયેલી એક મોટી ફરિયાદ એ હતી કે આટલી અઘરી સ્પર્ધા હોવા છતાં તેને સત્તાવાર 'સ્પોર્ટ્સ કોમ્પિટિશન' માં સ્થાન ન મળવાને કારણે તેના પ્રમાણપત્રો સરકારી નોકરીમાં માન્ય ગણાતા નથી. જોકે, આ વખતે મંત્રી પ્રદ્યુમન વાજાએ આશાસ્પદ નિવેદન આપતા જણાવ્યું છે કે સરકાર તમામ આયામોની તપાસ કરી રહી છે અને ભવિષ્યમાં આ સ્પર્ધાના વિજેતાઓને સરકારી લાભો મળે તે દિશામાં યોગ્ય કાર્યવાહી કરવામાં આવશે. આ જાહેરાતથી ખેલાડીઓમાં નવો સંચાર જોવા મળ્યો છે, કારણ કે આ માત્ર રમત નથી પણ ગિરનાર પ્રત્યેની આસ્થા અને શારીરિક સૌષ્ઠવની કસોટી છે.

સ્પર્ધાનું સંચાલન અને દેખરેખ જિલ્લા યુવા વિકાસ અધિકારી એન.ડી. વાળાના માર્ગદર્શન હેઠળ ચુસ્ત રીતે કરવામાં આવી રહ્યું છે. દરેક ચેકપોઇન્ટ પર મેડિકલ ટીમ અને પાણીની વ્યવસ્થા તૈનાત કરવામાં આવી છે જેથી કોઈ અનિચ્છનીય ઘટના ન બને. બપોર બાદ જ્યારે તમામ સ્પર્ધકો પોતાનું લક્ષ્ય પૂરું કરીને પરત ફરશે, ત્યારે વિજેતાઓને રોકડ પુરસ્કાર, ટ્રોફી અને સર્ટિફિકેટ આપીને સન્માનિત કરવામાં આવશે. જૂનાગઢવાસીઓ પણ આ સાહસિકોને પ્રોત્સાહન આપવા માટે મોટી સંખ્યામાં રસ્તા પર ઉતરી આવ્યા હતા, જે દર્શાવે છે કે ગિરનાર માત્ર પર્વત નથી પણ ગુજરાતના ગૌરવનું પ્રતીક છે.