ચોટીલા:યાત્રાધામ ચોટીલામાં રવિવારની વહેલી સવાર ધાર્મિક મંત્રોચ્ચારને બદલે જેસીબી અને બુલડોઝરના ગડગડાટથી ગુંજી ઉઠી હતી. વહીવટી તંત્રએ લાખો શ્રદ્ધાળુઓની સુવિધા માટે દબાણ હટાવવાનું અત્યાર સુધીનું સૌથી મોટું ઓપરેશન હાથ ધર્યું હતું. ખાસ કરીને ચામુંડા માતાજીના ડુંગર તરફ જતાં 40 ફૂટ પહોળા રસ્તા પર દુકાનદારોએ બંને બાજુથી 10-10 ફૂટના દબાણો કરી રસ્તાને સાંકડી ગલી જેવો બનાવી દીધો હતો. તંત્રએ કોઈપણ શેહશરમ રાખ્યા વિના આ ગેરકાયદે બાંધકામો પર હથોડો ઝીંક્યો હતો. આ કાર્યવાહી દરમિયાન વર્ષોથી જામી ગયેલા દબાણો દૂર થતા રસ્તો હવે મોકળો બન્યો છે, જેનાથી ભક્તોને ટ્રાફિકની સમસ્યામાંથી મોટી રાહત મળી છે.

આ મેગા ડ્રાઈવ દરમિયાન સૌથી મોટો ડ્રામા નવગ્રહ મંદિર પાસે સર્જાયો હતો. જ્યારે તંત્ર દ્વારા મંદિર પાસે આવેલા ત્રણ માળના ગેસ્ટ હાઉસને તોડવાની તૈયારીઓ શરૂ કરવામાં આવી, ત્યારે મંદિરના મહંત અને તેમના પરિવારજનોએ બુલડોઝરની આડે ઉતરી વિરોધ નોંધાવ્યો હતો. આ સમયે સ્થળ પર હાજર કલેક્ટર અને મહંત વચ્ચે રસ્તાની વચ્ચોવચ ઉગ્ર બોલાચાલી થઈ હતી અને મામલો ઘર્ષણ સુધી પહોંચ્યો હતો. કલેક્ટર સામે શિંગડા ભેરવનારા મહંત અને તેમના પરિવારને પોલીસે બળજબરીપૂર્વક ગાડીમાં બેસાડી પોલીસ મથકે ખસેડવા પડ્યા હતા. આ ઘટનાના વીડિયો સોશિયલ મીડિયા પર વાયરલ થતા યાત્રાધામમાં ભારે ગરમાવો જોવા મળ્યો હતો.

તંત્રની આ કડક કાર્યવાહી માત્ર રસ્તાઓ પૂરતી સીમિત નહોતી. નાના પાળિયાદ અને મફતિયાપરા વિસ્તારમાં પણ વર્ષો જૂના દબાણો પર બુલડોઝર ફેરવી દેવામાં આવ્યું હતું. સત્તાવાર આંકડા મુજબ, આ ઝુંબેશમાં આશરે 17 એકર જેટલી સરકારી જમીન ભૂમાફિયાઓના કબજામાંથી મુક્ત કરવામાં આવી છે. આ જમીનની બજાર કિંમત આશરે ₹105 કરોડ જેટલી આંકવામાં આવી રહી છે. યાત્રાધામમાં આટલી મોટી કિંમતની જમીન ખુલ્લી થતા જમીન દબાવનારા તત્વોમાં ફફડાટ ફેલાયો છે. તંત્રએ સ્પષ્ટ સંદેશ આપ્યો છે કે ભક્તોની સુવિધામાં જે કોઈ આડખીલી રૂપ બનશે તેને સાંખી લેવામાં આવશે નહીં.

ભલે મહંતની અટકાયતને લઈને શ્રદ્ધાળુઓમાં મિશ્ર પ્રતિસાદ જોવા મળી રહ્યો હોય, પરંતુ રસ્તાઓ ખુલ્લા થવાના નિર્ણયને બહુમતી લોકોએ આવકાર્યો છે. ચોટીલા આવતા લાખો યાત્રિકોને સાંકડા રસ્તાઓને કારણે કલાકો સુધી ટ્રાફિકમાં ફસાવું પડતું હતું, જે હવે ભૂતકાળ બની જશે. જિલ્લા કલેક્ટરના નેતૃત્વમાં ચાલેલી આ લાલ આંખે ચોટીલાનું ચિત્ર બદલી નાખ્યું છે. આગામી દિવસોમાં આ ખુલ્લી થયેલી જમીન પર શ્રદ્ધાળુઓ માટે નવી સુવિધાઓ જેવી કે પાર્કિંગ અને આરામગૃહ બનાવવાનું પણ તંત્રનું આયોજન છે. આ કાર્યવાહીએ સાબિત કરી દીધું છે કે કાયદો દરેક માટે સમાન છે, પછી તે સામાન્ય દુકાનદાર હોય કે પ્રભાવશાળી મહંત.