કૌશલ સવજાણી દ્વારા, જામખંભાળિયા : દેવભૂમિ દ્વારકા જિલ્લાના ખંભાળિયા તાલુકાના રામનગર ગામના ગુંદ મોરાવાળી વિસ્તારમાં એક ૨૫ વર્ષીય સતવારા યુવાનની કરપીણ હત્યા કરવામાં આવતા સમગ્ર પંથકમાં ભય અને ચકચારનો માહોલ ફેલાયો છે. યુવાનની હત્યા પાછળ પ્રેમ પ્રકરણ અથવા યુવતીનો કોઈ મામલો જવાબદાર હોવાનું પ્રાથમિક તપાસમાં બહાર આવી રહ્યું છે.

ઘટનાની વિગત અને હત્યાની પદ્ધતિ:
બનાવ અંગેની પ્રાપ્ત વિગતો મુજબ, રામનગરના ગુંદ મોરાવાળી વિસ્તારમાં રહેતા ૨૫ વર્ષીય સતવારા જ્ઞાતિના યુવાન પર કોઈ અજાણ્યા અથવા પરિચિત શખ્સોએ હુમલો કર્યો હતો. પ્રાથમિક તબક્કે જાણવા મળતા મુજબ, યુવાનને પહેલા ગળાટૂંપો આપવામાં આવ્યો હતો અને ત્યારબાદ લોખંડની કોઈ ભારે વસ્તુ મારીને તેને મોતને ઘાટ ઉતારી દેવામાં આવ્યો હતો. મૃતક યુવાન પરણિત હોવાનું પણ જાણવા મળ્યું છે, જેના કારણે પરિવારમાં શોકનું મોજું ફરી વળ્યું છે.

પ્રેમ પ્રકરણ અને કુટુંબીજનોની સંડોવણી:
ચર્ચાઈ રહેલી વિગતો પ્રમાણે, આ હત્યા કોઈ યુવતી સાથેના પ્રેમ પ્રકરણ અથવા ધરાર પ્રેમ પ્રકરણના સંદર્ભમાં કરવામાં આવી હોય શકે છે. વધુ ચોંકાવનારી વિગત એ છે કે આ જઘન્ય હત્યાના ગુનામાં મૃતકના અંદરો અંદરના કુટુંબીજનો જ સંકળાયેલા હોવાની ચર્ચાએ પણ જોર પકડ્યું છે. સતવારા સમાજમાં આ બનાવને પગલે ભારે અરેરાટી વ્યાપી ગઈ છે.

પોલીસનો કાફલો ઘટનાસ્થળે:
હત્યાના આ ગંભીર બનાવની જાણ થતા જ જિલ્લા પોલીસ વડા જયરાજસિંહ વાળાના સીધા માર્ગદર્શન હેઠળ પોલીસ તંત્ર હરકતમાં આવ્યું છે. ડીવાયએસપી વિસ્મય માનસેતા તથા ખંભાળિયા પીસીઆઈ નિકુંજ જોશી સહિતનો પોલીસ કાફલો તાત્કાલિક ઘટનાસ્થળે દોડી ગયો હતો. પોલીસે મૃતદેહને પોસ્ટમોર્ટમ માટે ખસેડીને પુરાવા એકત્ર કરવાની કામગીરી હાથ ધરી છે. હત્યા કરનારા શખ્સો કોણ હતા અને ચોક્કસ કયા કારણોસર આ કૃત્ય આચરવામાં આવ્યું તે દિશામાં પોલીસે તપાસના ચક્રો ગતિમાન કર્યા છે. આરોપીઓને પકડી પાડવા માટે અલગ-અલગ ટીમો બનાવીને ચક્રો ગતિમાન કરવામાં આવ્યા છે.