( પ્રવિણ વ્યાસ દ્વારા ) મોરબીમાં સામાજિક સેવા અને સંગઠનની પ્રવૃત્તિઓ હંમેશા અગ્રેસર હોય છે. ત્યારે આગામી તારીખ ૧૩ ફેબ્રુઆરી ર૦ર૬ ને શુક્રવારના રોજ શ્રી કોઠાવાળા મચ્છુ યુવા સંગઠન સમૂહ લગ્ન સમિતિ -મોરબી દ્વારા સમસ્ત ભરવાડ સમાજના સાતમા સમૂહ લગ્નોત્સવનું ભવ્ય આયોજન કરવામાં આવ્યું છે. આ સમૂહ લગ્નમાં સમાજના ૨૬ નવદંપતીઓ લગ્નગ્રંથીથી જોડાઈને પ્રભુતામાં પગલાં માંડશે. આ શુભલગ્ન પ્રસંગ ત્રાજપર ચાર રસ્તા, સુર્યસ પેટ્રોલ પંપ પાછળ, જુના ઘુંટુ રોડ, મોરબી-ર ખાતે યોજાશે.

આ માંગલિક અવસરના મંગલ પ્રારંભે તા. ૧૨/૦૨/૨૦૨૬ ને શુક્રવારે સવારે ૮:૩૦ કલાકે ગણેશ સ્થાપના અને મંડપ મુહૂર્ત યોજાશે. ત્યારબાદ મુખ્ય લગ્ન વિધિ એટલે કે હસ્ત મેળાપ તા. ૧૩/૦૨/૨૦૨૬ ને શુક્રવારના રોજ વહેલી સવારે ૬:૦૦ કલાકે રાખવામાં આવેલ છે. ત્યારબાદ સવારે 90:00 કલાકે ભોજન સમારંભનું આયોજન કરવામાં આવ્યું છે.
આ પ્રસંગે નવદંપતીઓને આશીર્વાદ આપવા માટે વંદનીય સંતો ખાસ ઉપસ્થિત રહેશે. જેમાં મહામંડલેશ્વર મહંત ઘનશ્યામપુરીજી (શ્રી ગ્વાલીનાથ મહાદેવની જગ્યા - થરા), મહેશપુરીજી (શ્રી શિવપુરીધામ -દ્વારકા), ગાંડુભગત (શ્રી મચ્છુ માતાજીની જગ્યા - મો૨બી), રતનપુરીજી (શ્રી રાણાબાપા આશ્રમ - માથક), દેવા ભગત (શ્રી નકલંક ઠાકરની જગ્યા- વેજલપર), રોહિતપુરીજી (શ્રી પાપનાસણા ઠાકરની જગ્યા-તરણેતર) તેમજ અન્ય સંતો હાજરી આપશે. આ ઉપરાંત 3001 દીકરીઓના સમૂહ લગ્નોત્સવના દાતા એવા સ્વર્ગસ્થ બેચરભાઈ તેજાભાઈ ગમારા (અમદાવાદ)ના પુત્ર વિનુભાઈ બેચરભાઈ ગમારા પણ આ સમૂહ લગ્નોત્સવમાં હાજરી આપશે. લગ્ન વિધિ શાસ્ત્રી અમિતભાઈ જે. પંડયા દ્વારા કરાવવામાં આવશે.
આ સમૂહ લગ્નનો મુખ્ય હેતુ સમાજને બાળલગ્ન અને કન્યા વિક્રય જેવા દૂષણોથી મુક્ત કરવાનો તેમજ ખોટા ખર્ચાઓ બચાવી સમાજમાં એકસૂત્રતા અને શિક્ષણનો વ્યાપ વધારવાનો છે. આ આયોજનને સફળ બનાવવા શ્રી કોઠાવાળા મચ્છુ યુવા સંગઠન સમૂહલગ્ન સમિતિ અને સમસ્ત ભરવાડ સમાજ મોરબી જહેમત ઉઠાવી રહ્યો છે. સમાજના દાતાઓ દ્વારા ભોજન, પાનેતર, સોના-ચાંદીની ભેટ અને કરિયાવર માટે ઉદાર હાથે ફાળો આપવામાં આવ્યો છે.