અમરેલી શહેરમાં હાલમાં ચાલી રહેલી લગ્નની સીઝન વચ્ચે એક આનંદના પ્રસંગમાં વિઘ્ન સંતોષી તત્વોને કારણે ગંભીર વિવાદ સર્જાયો છે. શહેરના જેસીંગપરા વિસ્તારમાં ગત રાત્રે એક લગ્ન પ્રસંગ દરમિયાન ગાડીનો કાચ તૂટવા જેવી નજીવી બાબતે સ્થાનિકો અને જાનૈયાઓ વચ્ચે ઉગ્ર બોલાચાલી બાદ સામસામે હુમલા અને રૂપાઝૂપીના દ્રશ્યો સર્જાયા હતા. આ ઘટનાને પગલે લગ્ન પ્રસંગની ખુશી પળવારમાં ભય અને તણાવમાં ફેરવાઈ ગઈ હતી. લોકોમાં નાસભાગ મચી ગઈ હતી અને મામલો બિચકતા પોલીસને જાણ કરવામાં આવી હતી.

ઘટનાની વિગત એવી છે કે, જેસીંગપરા વિસ્તારમાં એક લગ્ન સમારોહ યોજાઈ રહ્યો હતો, ત્યારે પાર્કિંગમાં રાખેલી અથવા પસાર થતી એક ગાડીનો કાચ અચાનક તૂટી જવાથી વિવાદની શરૂઆત થઈ હતી. આ બાબતે જાન પક્ષ અને સ્થાનિક રહેવાસીઓ વચ્ચે બોલાચાલી શરૂ થઈ, જે જોતજોતામાં હિંસક સ્વરૂપ ધારણ કરી ગઈ હતી. બંને પક્ષો વચ્ચે થયેલી ઝપાઝપીમાં કેટલાક લોકોને સામાન્ય ઈજાઓ પણ પહોંચી હોવાના અહેવાલ છે. વાતાવરણ એટલું તંગ બની ગયું હતું કે આસપાસના લોકોમાં ફફડાટ ફેલાઈ ગયો હતો અને પ્રસંગમાં આવેલા મહેમાનો સુરક્ષિત જગ્યાએ દોડી ગયા હતા.

પોલીસની ટુકડી તાત્કાલિક ઘટનાસ્થળે પહોંચી હતી અને પરિસ્થિતિ પર કાબૂ મેળવ્યો હતો. પોલીસે બંને પક્ષોને શાંત પાડી મામલો થાળે પાડવા પ્રયાસો કર્યા હતા. આ મામલે પોલીસે ફરિયાદ લેવાની તજવીજ હાથ ધરી છે અને સીસીટીવી ફૂટેજ તેમજ પ્રત્યક્ષદર્શીઓના આધારે તપાસ શરૂ કરી છે કે ખરેખર ગાડીનો કાચ કઈ રીતે તૂટ્યો અને હિંસાની શરૂઆત કોણે કરી હતી. 

અમરેલીના જેસીંગપરામાં બનેલી આ ઘટનાને કારણે સ્થાનિકોમાં રોષ જોવા મળી રહ્યો છે. લગ્ન જેવા માંગલિક પ્રસંગે થયેલી આ માથાકૂટને પગલે પરિવારજનો પણ દુઃખી થયા છે.