બોટાદ: સ્ટેટ મોનિટરિંગ સેલ (SMC) ની ટીમે બોટાદ જિલ્લામાં દારૂબંધીના કાયદાનો કડક અમલ કરાવતા એક મોટા નેટવર્ક પર ત્રાટકી સફળતા મેળવી છે. પીએસઆઈ એસ. વી. ગલચર અને તેમની ટીમે ચોક્કસ બાતમીના આધારે પાલિયાદ પોલીસ સ્ટેશન હેઠળના રતનપર ગામમાં ધોળાકુવા પાસેના ખુલ્લા ખેતરમાં રેડ કરી હતી. આ કાર્યવાહીમાં વિદેશી દારૂ અને વાહનો મળી કુલ રૂ. ૮૯,૩૪,૬૦૪/- નો મુદ્દામાલ કબજે કરવામાં આવ્યો છે.
ચંદીગઢથી સપ્લાય થતો હતો વિદેશી દારૂનો જંગી જથ્થો
દરોડા દરમિયાન વિદેશી દારૂની કુલ ૧૫,૩૨૪ બોટલો મળી આવી હતી, જેની કિંમત રૂ. ૬૪,૩૩,૧૦૪/- થાય છે. આ જથ્થો ચંદીગઢની પ્રખ્યાત ડિસ્ટિલરીઓ જેવી કે બ્લુ સ્ટોક વ્હિસ્કી, ડિસ્કાઉન્ટ પ્રીમિયમ વ્હિસ્કી અને લંડન પ્રાઈડ પ્રીમિયમ વ્હિસ્કીમાં બનેલો હોવાનું સામે આવ્યું છે. બુટલેગરો આ જથ્થો ટાટા ટ્રક (નં. RJ21GA8426) દ્વારા લાવી કટિંગ કરી રહ્યા હતા. પોલીસે રૂ. ૨૫ લાખની ટ્રક અને તાડપત્રી સહિતનો તમામ માલ સામાન જપ્ત કર્યો છે.
બુટલેગર વિજય બોરીચા સહિત ૮ આરોપીઓ સામે કાર્યવાહી
પોલીસે આ રેડમાં કુલ ૮ આરોપીઓ વિરુદ્ધ પ્રોહિબિશન એક્ટ અને ભારતીય ન્યાય સંહિતા (BNS) ની વિવિધ કલમો હેઠળ ગુનો નોંધ્યો છે. જેમાં મુખ્યત્વે લિસ્ટેડ બુટલેગર વિજય રવુ બોરીચા (રહે. રાયપર), ઉદય રાણુભાઈ ખાચર, હિતેશ હરેશ ખાચર અને કાર્તિક શિવરાજ ખાચર (તમામ રહે. ખાંભડા) નો સમાવેશ થાય છે. આ ઉપરાંત ટાટા ટ્રકના માલિક અને ચાલક, કાળા રંગની સ્કોર્પિયોનો ચાલક, વિજય બોરીચાનો અજાણ્યો માણસ અને દારૂ સપ્લાય કરનાર અજાણ્યા શખ્સને વોન્ટેડ જાહેર કરી શોધખોળ હાથ ધરવામાં આવી છે.
કાયદાનો કડક સકંજો
આ કેસમાં પ્રોહિબિશન એક્ટની કલમ ૬૫(એ)(ઈ), ૮૧, ૮૩, ૯૮(૨) અને ૧૧૬(બી) તેમજ ભારતીય ન્યાય સંહિતાની કલમ ૩૩૬(૨), ૩૩૬(૩), ૩૪૦(૨), ૧૧૧(૨)(બી) તથા ૧૧૧(૩)(૪) હેઠળ ગુનો દાખલ કરવામાં આવ્યો છે. પીએસઆઈ એસ. વી. ગલચરના આ ઓપરેશનથી બોટાદ પંથકના બુટલેગરોમાં ફફડાટ વ્યાપી ગયો છે.