અમરેલી :કેસર કેરીના ગઢ ગણાતા અમરેલી જિલ્લાના ધારી તાલુકામાં કુદરતી આફત ત્રાટકી છે. ગુરુવારે જર, મોરઝર, પરબડી, દુધાળા અને માણાવાવ સહિતના અનેક ગામોમાં તોફાની પવન અને મીની વાવાઝોડા સાથે ખાબકેલા કમોસમી વરસાદે ભારે તબાહી મચાવી છે. પવનની ગતિ એટલી તીવ્ર હતી કે આંબા પરથી તૈયાર થવા આવેલી કેસર કેરીઓ મોટી સંખ્યામાં ખરી પડી છે. આ આકાશી આફતને કારણે બાગાયતી ખેતી કરતા ખેડૂતોના મોંઢે આવેલો કોળિયો છીનવાઈ ગયો છે અને લાખો રૂપિયાનું નુકસાન થવાની ભીતિ સેવાઈ રહી છે.