(વિનોદ ગાલા દ્વારા)ભુજ તા.૨૩ :  ઉત્તરપ્રદેશનાં પુરવા જીલ્લાનાં બેરાઇચ ખારિધાર વિસ્તારનો યુવાન દુઃખીરામ ઉ.વ. ૩૧ ગુમ થતાં પરિવારજનોએ તેની સતત શોધ ચલાવી હતી. તે અનેક રાજ્યોમાં સતત રખડતો-ભટકતો રહ્યો હતો. ચાર વર્ષ પછી તે કચ્છનાં માંડવી તાલુકાનાં નાનાભાડિયા વિસ્તારમાંથી માનવજ્યોતનાં કાર્યકર દેવાંગભાઇ ગઢવીને મળી આવતાં તેમણે પોતનાં વાહન મારફતે આ યુવાનને માનવજ્યોત કાર્યાલયે પહોંચાડેલ.

​શ્રી રામદેવ સેવાશ્રમ પાલારા-કચ્છ મધ્યે તેને આશ્રય આપવામાં આવ્યો. સેવાશ્રમનાં સામાજિક કાર્યકર રીતુબેન વર્માએ ઉત્તરપ્રદેશ પોલીસની મદદથી તેનાં ઘર-પરિવાર શોધી કાઢતાં તેને તેડવા પરિવારનાં ૭ સભ્યો ભુજ આવી પહોંચ્યા હતા.

​૪ વર્ષ પછી પરિવાર સાથે તેનું મિલન થતાં ભાવુક દ્રશ્યો સર્જાયા હતા. પરિવારજનોનાં જણાવ્યા મુજબ તેને ૭ વર્ષની દીકરી છે. તેની પત્ની-દીકરી બંને પિયરમાં છે. જે પણ હવે દીકરીને લઇ ફરી પાછી પતિ સાથે રહેવા આવી જશે. આજે તે ૩૫ વર્ષનો થઇ પોતાનાં ઘર સુધી પહોંચ્યો છે. માનવતાનાં આ કાર્યમાં પ્રબોધ મુનવર, આનંદ રાયસોની, દીપેશ શાહ, પંકજ કુરૂવા, દિલીપ લોડાયા, વાલજી કોલી, દીપક મોમાયા, ચાંદુભા ચૌહાણ, મનીષ મારાજ સહભાગી બન્યા હતા.