જામનગર: જામનગર શહેરના સમાજ સેવક મહાવીર દળ સંચાલિત આદર્શ સ્મશાન (સોનાપુરી) ખાતે વાલ્મીકી રામાયણના વિવિધ પ્રસંગોને જીવંત કરતા ચિત્રોનું ભવ્ય અનાવરણ કરવામાં આવ્યું છે. સ્મશાન વ્યવસ્થા સમિતિ-જામનગર દ્વારા આયોજિત આ કાર્યક્રમમાં શહેરના અગ્રણી દાતાઓ અને સંસ્થાના હોદ્દેદારો મોટી સંખ્યામાં ઉપસ્થિત રહ્યા હતા.

જર્જરિત દીવાલનું નવસર્જન:
ગત સમયમાં થયેલી ભારે અતિવૃષ્ટિના કારણે સ્મશાનની દીવાલ જર્જરિત હાલતમાં ફેરવાઈ ગઈ હતી. આ દીવાલનું સંસ્થા દ્વારા પુનઃનિર્માણ કરવામાં આવ્યું હતું. આ નવનિર્મિત દીવાલ પર વાલ્મીકી રામાયણના પ્રસંગો અંકિત કરવાનો સંકલ્પ કરવામાં આવ્યો હતો, જે વિવિધ દાતાઓના ઉદાર આર્થિક સહયોગથી પૂર્ણ થયો છે. રામાયણના આ ચિત્રો હવે સ્મશાનની મુલાકાતે આવતા લોકો માટે આકર્ષણ અને આસ્થાનું કેન્દ્ર બનશે.

દાતાઓના હસ્તે અનાવરણ:
આ પ્રસંગે ઉપસ્થિત રહેલા મહાનુભાવો અને દાતાઓના વરદ હસ્તે ચિત્રોનું અનાવરણ વિધિવત રીતે કરવામાં આવ્યું હતું. જેમાં નવાનગર કો-ઓપરેટિવ બેંક લિમિટેડના ચેરમેન અશોકભાઈ જીતપુરા, નીમુબેન મહેશભાઈ રામાણી પરિવાર, ધીરજલાલ ટી. બરછા પરિવાર, જીતેન્દ્રભાઈ માડમ પરિવાર તેમજ જગદીશભાઈ પ્રાગજીભાઈ નંદા પરિવારના સભ્યો જોડાયા હતા. ઉપસ્થિત તમામ મહાનુભાવોએ આ સેવાકીય કાર્યને બિરદાવ્યું હતું.

સંસ્થાના હોદ્દેદારોની ઉપસ્થિતિ:
કાર્યક્રમને સફળ બનાવવા માટે સંસ્થાના પ્રમુખ દીપકભાઈ ઠક્કર, મંત્રી દર્શનભાઈ ઠક્કર તથા સહમંત્રી ધવલભાઈ બરછાએ જહેમત ઉઠાવી હતી. આ ઉપરાંત કાર્યક્રમમાં કોષાધ્યક્ષ અમરભાઈ ગોદિયા, કારોબારી સભ્ય વિશ્વાસભાઈ ઠક્કર, સુધીરભાઈ રાઠોડ, વિવેકભાઈ રામાણી, તેજભાઈ ઠક્કર તેમજ નિમંત્રિત સદસ્ય રામભાઈ બરછા અને દિવ્યેશભાઈ દાવડા સહિતના અગ્રણીઓ હાજર રહી કાર્યક્રમની શોભા વધારી હતી.