ભાવનગર: ગોહિલવાડની ધરતી પર ફરી એકવાર લોહિયાળ જંગ ખેલાયો છે, જેમાં ભાવનગર જિલ્લાના ઘોઘા તાલુકાના વાળુકડ ગામ પાસે એક યુવાનની નિર્મમ હત્યાનો બનાવ સામે આવ્યો છે. ૨૮ માર્ચની રાત્રે બનેલી આ ઘટનાએ સમગ્ર જિલ્લામાં ચકચાર મચાવી દીધી છે. ૨૯ વર્ષીય રવિભાઈ અનિલભાઈ ક્લોતરા જ્યારે પોતાની મોપેડ પર પસાર થઈ રહ્યા હતા, ત્યારે અચાનક અજાણ્યા હુમલાખોરોએ તેમને આંતરી લીધા હતા. કોઈ પણ પ્રકારના ડર વગર ગુનેગારોએ રવિભાઈના પેટના ભાગે તીક્ષ્ણ છરીના ઉપરાછાપરી ઘા ઝીંકીને તેમને લોહીલુહાણ કરી દીધા હતા.

આ ભયાનક ઘટનાનો એક ચોંકાવનારો વીડિયો પણ સોશિયલ મીડિયા પર વાયરલ થયો છે, જેણે લોકોના કાળજા કંપાવી દીધા છે. રસ્તા પરથી પસાર થતી એક કારના ચાલકે આ સમગ્ર દ્રશ્ય પોતાના મોબાઈલ કેમેરામાં કેદ કર્યું હતું. વીડિયોમાં સ્પષ્ટ દેખાય છે કે ત્રણ શખ્સો હાથમાં તીક્ષ્ણ હથિયારો લઈને રસ્તા વચ્ચે મોપેડ પાસે પડેલા યુવક પર તૂટી પડ્યા છે. એક સ્થાનિક વ્યક્તિએ હિંમત બતાવીને હુમલાખોરોને રોકવાનો અને યુવકને બચાવવાનો પ્રયાસ કર્યો હતો, પરંતુ લોહી તરસ્યા શિકારીઓએ કોઈની પણ પરવા કર્યા વગર પોતાનું પાપી કૃત્ય ચાલુ રાખ્યું હતું.

ગંભીર રીતે ઘાયલ રવિભાઈને તાત્કાલિક સારવાર અર્થે ભાવનગરની સર ટી હોસ્પિટલ ખાતે ખસેડવામાં આવ્યા હતા, પરંતુ કમનસીબે હોસ્પિટલના બિછાને પહોંચતા જ તબીબોએ તેમને મૃત જાહેર કર્યા હતા. ઘટનાની ગંભીરતાને જોતા વરતેજ પોલીસનો મોટો કાફલો અને ઉચ્ચ અધિકારીઓ તાત્કાલિક ઘટનાસ્થળે દોડી ગયા હતા. પોલીસે મૃતદેહનું પોસ્ટમોર્ટમ કરાવીને તેને પરિવારને સોંપવાની તજવીજ હાથ ધરી છે. પ્રાથમિક તપાસમાં આ હત્યા પાછળ જૂની અદાવત છે કે અન્ય કોઈ કારણ, તે હજુ સ્પષ્ટ થયું નથી, પરંતુ પોલીસે વાયરલ વીડિયોના આધારે આરોપીઓની ઓળખ કરવાના પ્રયાસો તેજ કર્યા છે.

હત્યા કર્યા બાદ ત્રણેય હુમલાખોરો મોપેડ પર સવાર થઈને નાસી છૂટવામાં સફળ રહ્યા હતા. હાલમાં ભાવનગર પોલીસે અલગ-અલગ ટીમો બનાવીને જિલ્લાભરમાં નાકાબંધી કરી છે અને આરોપીઓને ઝડપી પાડવા માટે સર્ચ ઓપરેશન શરૂ કર્યું છે. આ ઘટનાને પગલે વાળુકડ અને આસપાસના ગ્રામ્ય વિસ્તારોમાં ભય અને અજંપાભરી શાંતિ છવાયેલી છે. લોકોમાં એવી ચર્ચા છે કે જો ગુનેગારોને પોલીસનો જરા પણ ભય રહ્યો હોત, તો આવી રીતે જાહેરમાં કોઈની હત્યા કરવાની હિંમત ન કરી શકત. હવે જોવાનું એ રહેશે કે ભાવનગર પોલીસ ક્યારે આ ખૂની ખેલના સૂત્રધારોને જેલના સળિયા પાછળ ધકેલે છે.